2021-ci il oktyabrın13-14-də Baltikyanı ölkələrin (Latviya, Litva və Estoniya), həmçinin Ukrayna və Azərbaycanın əlaqədar təşkilatları ilə birlikdə HAnimSPAC (Dayanıqlı İstehsal və İstehlak üçün Xoşbəxt Heyvanlar) birgə layihəsinin ilk iclası (onlayn) keçirildi. Layihə İsveç Kənd Təsərrüfatı Elmləri Universiteti tərəfindən təşkil olunub. Layihəyə 50.000,00 avro məbləğində grant ayrılıb. Xəzər Universitetindən dosent İradə Xəlilova və dosent Cavid Ocağı bu layihədə iştirak edirlər.
Görüş zamanı hər bir iştirakçı təşkilatın nümayəndələri öz təşkilatları və layihədəki rolları haqqında təqdimat etdi. Görüşdə, həmçinin, cari məsələlər, qanunvericilik və gələcək addımlar barədə müzakirələr aparıldı.
18 aylıq layihə tərəfdaş ölkələrin mövcud vəziyyətini, fermerlərin və istehlakçıların heyvan rifahının əhəmiyyəti ilə bağlı fikirlərini araşdırmaq, əsas problemləri müəyyən etmək və heyvanların rifahının iqtisadi təsirini qiymətləndirmək, nəticələri araşdırmaq üçün həm əyani, həm də onlayn bir simpozium təşkil etmək, gələcək fəaliyyətləri müəyyən etmək və AB çərçivə proqramı Horizon Europe daxilində layihə üçün bir plan hazırlamaqdan ötrü təşkil olunmuşdur.