Xəzər Universitetinin kollektivinə ağır itki üz vermişdir. Uzun illər ərzində universitetin maliyyə-mühasibat bölümünə rəhbərlik etmiş Kərim İsmayıl oğlu Kərimov 2021-ci il sentyabrın 11-də 85 yaşında vəfat etmişdir.

Kərim Kərimov 1936-cı ildə Gürcüstan SSR-in Qardabani rayonunun Birlik kəndində anadan olmuşdur. Orta təhsilini başa vurduqdan sonra 1958-63-cü illərdə Azərbaycan Dövlət Universitetində ali təhsil alaraq, mühasib-iqtisadçı ixtisasına yiyələnmişdir.

Abşeron Quşçuluq sovxozunda baş mühasib vəzifəsində əmək fəaliyyətinə başlayan Kərim Kərimov sonra sovxozun Nəzarət-təftiş şöbəsinin müdiri, sonrakı illərdə Bakı Quşçuluq Fabrikində baş mühasib vəzifəsində çalışmışdır.

1993-cü ilin iyun ayında Xəzər Universitetində baş mühasib vəzifəsinə təyin olunandan ömrünün sonunadək universitetdə çalışan Kərim Kərimov təxminən 25 il ərzində maliyyə-mühasibat bölümünə rəhbərlik etmişdir. Onun yüksək peşəkarlığı, böyük səriştəsi sayəsində universitetin maliyyə sahəsinə aid məsələlər vaxtında və uğurla həllini tapmışdır.

Kərim Kərimov müdrik, təmkinli, təvazökar və qayğıkeş davranışı ilə universitet kollektivinin dərin hörmətini qazanmışdı. Əziz xatirəsi onu tanıyanların qəlbində daim yaşayacaqdır.

Xəzər Universitetinin kollektivi