2021-ci il iyulun 14-də Erasmus+ MEDIATS layihəsi çərçivəsində tərəfdaşların iştirakı ilə virtual görüş keçirilmişdir. Görüşdə Azərbaycan universitetlərində mediasiya ixtisası üzrə magistr proqramlarının açılması, bu proqramlar üçün tədris proqramının hazırlanması, mediasiya ixtisaslarına qəbul olunmuş tələbələrin Murcia Katolik Universitetində (İspaniya) təlimlərdə iştirakı və layihənin bir illik uzadılması məsələləri müzakirə olunmuşdur.

Görüşdə Xəzər Universitetini İqtisadiyyat və menecment fakültəsinin dekanı Dr. Ceyhun Məmmədov və Təlim və Tədris Mərkəzinin direktoru Ülkər Bayramova təmsil etmişlər.

Xəzər Universiteti və Gəncə Dövlət Universitetinin əməkdaşları layihənin həyata keçirilməsi haqqında sualları cavablandırmış və mediasiya ixtisasları haqqında layihə koordinatorlarına məlumat vermişlər.

Dr. Ceyhun Məmmədov mediasiya üzrə MBA proqramına qəbul olmuş tələbələrin sayı, tərtib olunmuş sillabus və kreditlər haqqında iştirakçılara ətraflı məlumat vermişdir. Dr. Məmmədov bildirmişdir ki, növbəti tədris ilində mediasiya ilə bağlı bir sıra tədbirlərin və seminarların keçirilməsi də nəzərdə tutulmuşdur.

Mediasiya ixtisaslarının Azərbaycanda gec açılması və həmçinin Covid-19 səbəbindən yaranan bəzi problemlərə görə layihədə nəzərdə tutulmuş fəaliyyətlərin hamısını həyata keçirmək mümkün olmadığı üçün layihənin uzadılmasının vacib olduğu qeyd olunmuş və bu məqsədlə EACEA-ya məktub ünvanlanacağı iştirakçıların diqqətinə çatdırılmışdır.