2021-ci il iyulun15-də Xəzər Universitetinin tərəfdaşı olduğu Erasmus+ ECAR layihəsinin növbəti virtual görüşü keçirildi. Bakı Biznes Universitetinin koordinatoru olduğu bu layihənin görüşündə Azərbaycandan olan layihə tərəfdaşları ilə yanaşı Avropa universitetlərindən olan tərəfdaşlar da daxil olmaqla 25 nəfərə yaxın nümayəndə iştirak edirdi.

Layihənin koordinatoru Gülşən Bayramova gündəlikdə duran məsələləri görüş iştirakçılarının diqqətinə çatdırdı və layihə çərçivəsində keçirilmiş sorğular haqqında qısa məlumat verdi. Bundan sonra Azərbaycanda Rektorlar Konfransının yaradılması üçün sənədlərin hazırlanması, təşkilatın quruluşu və hüquqi bazası haqqında müzakirələr aparıldı.

Müzakirə olunan digər bir məsələ isə layihə çərçivəsində rektorların tərəfdaş olan Avropa təşkilatlarına səfərlərinin planlaşdırılması və həyata keçirilməsi barədə oldu. Qərara alındı ki, sentyabra qədər səfərlərin təşkili ilə bağlı vəziyyət haqqında layihə iştirakçılarına məlumat verilsin.

Xəzər Universitetini görüşdə Təlim və Tədris Mərkəzinin direktoru Ülkər Bayramova və İnkişaf Mərkəzinin layihə meneceri Səbinə Quluyeva təmsil edirdilər.