2021-ci il iyunun 22-də Xəzər Universitetində universitetlə ABŞ səfirliyi arasındakı tərəfdaşlığa uyğun olaraq CBELT-TKT layihəsi çərçivəsində “Dilin kommunikativ tədrisinin kontekstual tələblərə həssaslığı: Azərbaycan nümunəsi” mövzusunda interaktiv seminar keçirildi.

İştirakçılar Bakı, Abşeron, Sumqayıt və Azərbaycanın müxtəlif bölgələrindəki məcburi köçkün məktəblərindən olan İngilis dili müəllimləri idi. Nəzəri hissə ilə başlayan tədbirdə bütün vacib məqamlar məruzəçi - Xəzər Universiteti İngilis dili və ədəbiyyatı departamentinin müəllimi Gülnur Nəbiyeva tərəfindən vurğulandı və sonra interaktiv şəkildə davam etdi. Müəllimlər müzakirə prosesində fəal iştirak edərək, fikir və iradlarını bildirdilər, təcrübələrini həmkarları ilə bölüşdülər.

Sonda CBELT-TKT layihəsi iştirakçılarına tədris prosesində həm fərdi, həm də professional xarakterli problemləri konstruktiv şəkildə həll etmək bacarıqlarına yiyələnmək üçün praktik məsləhətlər verildi.

Tədbir təlim kursunu bitirən müəllimlərə sertifikatların verilməsi ilə yekunlaşdı.