Tarix və Arxeologiya departamentinin müəllimi Telman Nüsrətoğlunun “Osmanlı Hariciyesi’nin Güney Kafkasya Raporları (1852-1914)” kitabı Türkiyədə çapdan çıxmışdır.
Kitabda Türk-İslam dünyasının son dünya dövləti olan, yüzillər boyu Asiya, Avropa və Afrikaya hakimliyi, müxtəlif dillərə, dinlərə və mədəniyyətlərə sahib bir çox xalqı böyük tolerantlıqla bayraqları altında birləşdirmiş Osmanlı dövlətinin 1852-1914 illər tarixi işıqlandırılır. Burada əks olunan Dövlət Aliyesinin Qafqazdakı Rusiya işğalından sonra açılan diplomatik nümayəndəliklər vasitəsi ilə həyata keçirdiyi fəaliyyətlər, xüsusən də Baş Konsulluq tərəfindən hazırlanan hesabatlar, XIX əsrin ikinci yarısından sonra bölgədəki inkişaflar, qiymətləndirmələr, mövzu ilə əlaqədar İstanbula göndərdikləri məlumatlardır. Kitabda Osmanlı Xarici İşlər Nazirliyinin Cənubi Qafqazdakı fəaliyyətlərini işıqlandıran çox vacib Şahbender sənədləri ilk dəfə yayımlanır.