2021-ci il iyunun 18-20-də Bakı Dağçılıq Klubunun (Baku Alpine Club) təşkilatçılığı ilə bir qrup gənc Azərbaycanın ən hündür dağ yüksəkliyi olan Bazardüzü (4466 m) və Zəfər (4301 m) zirvələrində olmuşdur. Ekspedisiyanın iştirakçısı - Xəzər Universiteti MBA məzunu, İqtisadiyyat və biznes yüksək təhsil fakültəsinin dekan assistenti Nazilə Əliyeva Xəzər Universitetinin bayrağını Azərbaycanın ən yüksək nöqtəsində dalğalandırmışdır.

Qeyd edək ki, Bazardüzü zirvəsi Böyük Qafqaz dağlarının Baş Qafqaz silsiləsində, Rusiya Federasiyası ilə sərhəddə, Qusar rayonunun ərazisində yerləşir. Azərbaycanın 44 günlük Vətən müharibəsində qələbəsi şərəfinə Bazardüzü zirvəsindən şərqdə yerləşən adsız yüksəkliyə isə 2021-ci il fevralın 9-da rəsmi olaraq Zəfər zirvəsi adı verilmişdir.

Ekspedisiya iştirakçıları Zəfər zirvəsində Vətən müharibəsi şəhidlərinin xatirəsini yad etmiş, müzəffər Azərbaycan ordusunun döyüşçülərinə minnətdarlıq bildirmişlər.