“2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində xarici ali təhsil müəssisələrində təhsilləri başa çatdıqdan sonra Xəzər Universitetində pedaqoji fəaliyyətə cəlb olunmaları ilə bağlı razılıq məktubu təqdim olunmuş və müsabiqədən uğurla keçmiş namizədlərlə 2021-ci il iyunun 22-də onlayn görüş keçirilmişdir.

Görüşdə Xəzər Universitetinin rektoru və yüksək təhsil fakültələrinin əməkdaşları iştirak etmişdir. Universitetin rektorudosent İradə Xəlilova doktorantları təbrik edərək, yeni tədris ilində onlara uğurlar arzulamışdır. Sonra proqramın şərtlərinə əsasən bağlanmış üçtərəfli müqavilənin tələblərinin icra olunması, doktorantların öhdəlikləri və s. kimi məsələlər müzakirə olunmuşdur.

Qeyd edək ki, müsabiqədən əvvəl proqramla bağlı Xəzər Universitetinə çoxsaylı namizədlər müraciət etmiş, onların tədqiqat sahələri və planları ilə tanışlıq, habelə ixtisas uyğunluğunun dəqiqləşdirilməsi məqsədilə görüşlər keçirilmiş və uyğun namizədlərə təhsilləri başa çatdıqdan sonra universitetdə pedaqoji fəaliyyətə cəlb olunmalarına razılığı təsdiq edən məktub təqdim olunmuşdur. Müraciət edən namizədlərin 4 nəfəri müsabiqədən uğurla keçmişdir. Belə ki, müsabiqənin nəticəsinə əsasən Laləxanım Orucovanın Amerika Birləşmiş Ştatlarının Cənubi Florida Universitetində “Təhsilin idarəedilməsi”, Aygün Bədəlovanın Birləşmiş Krallığın London Universitet Kollecində “Neyroşünaslıq, fiziologiya və farmakologiya”, Osman Qarayevin Türkiyə Cümhuriyyətinin İstanbul Universitetinin Sosial Bilimler İnstitutunda “İqtisadiyyat”, Sərdar Əsədovun isə Amerika Birləşmiş Ştatlarının Tulsa Universitetində “Neft mühəndisliyi” ixtisası üzrə doktorantura təhsilinin Dövlət Proqramı çərçivəsində maliyyələşdirilməsi qərarı verilmişdir.

Bütün qalibləri Xəzər Universitetinin əməkdaşları adından təbrik edir və təhsillərində müvəffəqiyyətlər arzulayırıq!