2021-ci il iyunun 16-da Xəzər Universitetinin Mərmər salonunda Xəzər Universiteti və Türkiyə Məzunu Ziyalılar və İş Adamları Plaftormunun birlikdə təşkilatçılığı ilə Qarabağ uğrunda 44 günlük Vətən Müharibəsində Azərbaycanın haqq səsini dünyaya çatdırmaq üçün göstərdikləri fövqəladə dəstək və fəaliyyətə görə TRT (Türkiye Radyo Televizyon Kurumu), AA (Anadolu Ajansı), qazi və şəhid övladlarının təhsilinə dəstəyi üçün YAB (Yurtdışı türkler ve Akraba topluluklar Başkanlığı) rəhbərlərinə təşəkkür plaketi təqdim olunması münasibətilə tədbir keçirildi. Xəzər Universitetinin müəllimi, tarix elmləri üzrə fəlsəfə doktoru, Türk İslam Araşdırmaları Mərkəzinin sədri Telman Nüsrətoğlunun moderatorluğu ilə keçən tədbirdə universitetin rəhbərliyi, əməkdaşlar, Türkiyə Məzunu Ziyalılar və İş Adamları Plaftormunun nümayəndələri və tədbirə dəvət olunmuş TRT İdarə Heyətinin başqanı və Baş müdiri İbrahim Eren, AA İdarə Heyətinin başqanı və Baş müdiri Serdar Karagöz və YAB Başqanı Abdullah Eren iştirak edirdilər.

Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı çıxış edərək, qonaqları və iştirakçıları salamladı, Azərbaycanın Vətən müharibəsi günlərində TRT və AA`nın dünya informasiya məkanında Azərbaycana göstərdikləri misilsiz yardımdan bəhs etdi. 44 günlük Vətən müharibəsində Azərbaycanın yanında olduqlarına və haqq səsini dünyaya çatdırdıqlarına görə İbrahim Eren və Serdar Karagöz`ün Xəzər Universitetinin Təşəkkür plaketi ilə rəltif olunduqlarını bildirdi və İbrahim Eren`ə plaketi təqdim etdi. Serdar Karagöz`ə plaketi təqdim edən universitetin rektoru dosent İradə Xəlilova çıxışında qonaqlara təşəkkürünü bildirdi və haqq iş uğrunda fəaliyyətlərində onlara uğurlar arzuladı.

İbrahim Eren və Serdar Karagöz çıxış edərək, Azərbaycan xalqına qardaşlıq duyğularını ifadə etdilər, bundan sonra da daim Azərbaycanın yanında olacaqlarını bildirdilər.

Tədbirdə, eyni zamanda, Türkiyə Məzunu Ziyalılar və İş Adamları Plaftormunun nümayəndələri də Azərbaycanın haqq səsini dünyaya çatdırmaq üçün göstərdikləri dəstəyə görə TRT və AA rəhbərlərinə və azərbaycanlı gənçlərin, qazi və şəhid övladlarının təhsilinə dəstəyi üçün YAB başqanı Abdullah Eren`ə təşəkkür plaketi təqdim etdilər.

Türkiyə Məzunu Ziyalılar və İş Adamları Plaftormunun nümayəndələri adından çıxış edən Araz Aslanlı Türkiyə universitetlərindən məzun olan insanların Türkiyə-Azərbaycan münasibətlərinin yaxınlığından və Türkiyənin dəstəyindən qürur duyduqlarını ifadə etdi. Türkiyə Məzunu Ziyalılar və İş Adamları Plaftormu adından TRT başqanı İbrahim Eren`ə plaketi Xəzər Universitetinin Humanitar, təhsil və sosial elmlər fakültəsinin dekanı, filologiya elmləri üzrə fəlsəfə doktoru, dosent Elza Səmədova, AA genel müdiri Sərdar Karagözə plaketi tibb elmləri doktoru, əməkdar həkim, Türk Dünyası Kardioloqlar Birliyinin sədri Firdovsi İbrahimov, YAB başqanı Abdullah Eren`ə plaketi iş adamı Fazir Cəmilli təqdim etdi.

Tədbirin sonunda TRT Bakı təmsilçiliyi professor Hamlet İsaxanlıdan müsahibə aldı. Professor dünyada baş verən mühüm hadisələrdə informasiyanın böyük önəmindən danışdı, TRT və AA`nın bu sahədəki rolunu bir daha vurğuladı.

TRT və AA tədbirdən veriliş və xəbər yayımlamışlar:

https://fb.watch/69-Q0vcbGK/

https://www.aa.com.tr/tr/kurumsal-haberler/azerbaycandan-aa-ve-trtye-odul/2276082