Xəzər Universitetinin kollektivinə ağır itki üz vermişdir. Universitetin Təbiət elmləri və mühəndislik fakültəsinin Elektronika və telekommunikasiya departamentinin müdiri, fizika - riyaziyyat üsrə fəlsəfə doktoru, yarımkeçiricilər fizikası sahəsində mütəxəssis Nuru Səfərov 2021-ci il iyunun 9-da qəfil xəstəlikdən sonra ömrünün 55-ci ilində vəfat etmişdir.
Nuru Səfərov 1966-cı il oktyabrın 18-də Azərbaycan Respublikası Neftçala rayonunun Xəzər kəndində anadan olub.
1983-cü ildə Bakı şəhəri 1№-li fizika-riyaziyyat təmayüllü orta məktəbi bitirib. Həmin ildə Ukrayna Respublikasındakı Dnepropetrovsk Dövlət Universitetiin Radiofizika fakultəsinə qəbul olunub, 1988-ci ildə oranı radiofizika və elektronika ixtisası üzrə bitirib.
1988-ci ildə Azərbaycan Respublikası Elmlər Akademiyası Fizika İnstitutunun "Registr" xüsusi konstruktor bürosunda mühəndis vəzifəsində əmək fəaliyyətinə başlayıb. 1990-1994-cü illər ərzində Fizika İnstitutunun aspiranturasında əyani təhsil alıb. 1997-ci ildə dissertasiya işini müdafiə edərək, fizika-riyaziyyat elmləri namizədi alimlik dərəcəsinə layiq görülüb.
Nuru Səfərov 1997-ci ildən Xəzər Universitetində çalışmağa başlayıb. Həmin ilin dekabrında Tətbiqi və tibbi fizika departamentinin Tədris-təcrübə laboratoriyasının müdiri təyin edilmişdir. 1998-ci ilin sentyabrından həm də müəllim kimi çalışmışdır. 2011-ci ilin sentyabrında Elektronika və telekommunikasiya departamentinin müdiri təyin edilmiş və ömrünün sonunadək bu vəzifədə çalışmışdır.
Nuru Səfərov 2007-ci ildə Beynəlxalq Ekoenergetika Akademiyasının professoru adına layiq görülüb. 70-ə yaxın elmi məqaləsi var, 5 ixtira müəllifidir.
Nuru Səfərov Xəzər Universitetində çalışdığı müddətdə özünü peşəkar mütəxəssis, səriştəli departament müdiri, diqqətli həmkar, qayğıkeş müəllim kimi göstərmiş və xatirəsi onu tanıyanların qəlbində daim yaşayacaqdır.
Allah rəhmət eləsin!
Xəzər Universitetinin kollektivi