İnformasiya-kommunikasiya texnologiyalarının inkişafı, milli elm-təhsil sistemlərinin dünya elm-təhsil məkanına inteqrasiyasının təmin edilməsi, bibliometrik metodlardan səmərəli istifadə olunması elmi tədqiqatlarda informasiya-kitabxana təminatının müasirləşdirilməsini tələb edir.

ADU Elmi Kitabxana və İnformasiya Xidməti Mərkəzinin 2021-ci il iyunun 7-də keçirdiyi "Universitet kitabxanalarında bibliometrik və elmmetrik fəaliyyətin istiqamətləri" mövzusunda onlayn elmi seminar bu aktual problemə həsr olunmuşdu.

Seminarda Azərbaycan Dillər Universiteti, Bakı Dövlət Universiteti, ADA Universiteti, Xəzər Universiteti, Azərbaycan Dövlət İqtisad Universiteti və digər universitetlərdən nümayəndələr iştirak edirdilər.

Seminarda Xəzər Universiteti Kitabxana-İnformasiya Mərkəzinin (KİM) direktoru Tatyana Zaytseva “Xəzər Universitetinin KİM nümunəsində bibliometrik tədqiqatların əsas istiqamətləri” mövzusunda təqdimatla çıxış etmişdir.

Təqdimatda ölkəmizdə informasiya və kitabxana mütəxəssislərinin hazırlanmasının tədris planlarında bibliometriya məsələlərinə kifayət qədər diqqət verilmədiyi təəssüf hissi ilə vurğulanmışdır. Qeyd edilmişdir ki, informasiya və kitabxana sahəsində bibliometrik tədqiqatların inkişafı üçün ali təhsil sistemində müvafiq tələblərə cavab verən mütəxəssislərin hazırlanması, eyni zamanda tədris-metodiki vəsaitin işlənib hazırlanması vacibdir. Bu prosesdə xüsusi hazırlıq kursları və tədris vəsaitləri mövcud olan xarici universitet və kolleclərin təcrübəsindən yararlanmaq olar.