Neft Mühəndisləri Cəmiyyətinin (NMC) Xəzər Universiteti Tələbə Təşkilatı “2021-ci il üzrə Uğurlu Tələbə Təşkilatı Mükafatı”na (“Student Chapter Excellence Award 2021”) layiq görülmüşdür.

Bu mükafat tələbə təşkilatlarına verilən mükafatlar sırasında ən nüfuzlu ikinci mükafatdır və bütün dünyada mövcud tələbə təşkilatlarının təxminən yalnız 20 faizinə təqdim olunmuşdur.

Qeyd edək ki, NMC Xəzər Universiteti Tələbə Təşkilatı 2005-ci il yanvarın 1-də fəaliyyətə başlamışdır. Təşkilatın məqsədi tələbələri texniki biliklərə dərindən yiyələnməyə, onları dünya miqyasında nüfuzlu neft mütəxəssisləri cəmiyyətləri ilə əlaqə qurmağa sövq etmək və başqa mənfəətlərlə təmin etməkdən ibarətdir.

NMC Xəzər Universiteti Tələbə Təşkilatının 2020-2021-ci il üzrə idarə heyəti aşağıdakı kimidir:

Təşkilatın prezidenti - neft mühəndisliyi ixtisası üzrə 3-cü kurs tələbəsi Ziyəddin Ömərov; Təşkilatın vitse-prezidenti - neft mühəndisliyi ixtisası üzrə 3-cü kurs tələbəsi Diana İsmayılova; Rabitə və Kommunikasiya üzrə rəhbər - neft mühəndisliyi ixtisası üzrə 2-ci kurs magistr tələbəsi İmtiyaz Əhməd; Proqram rəhbəri - neft mühəndisliyi ixtisası üzrə 4-cü kurs tələbəsi Ayan Ağakişizadə; Mühasib - neft mühəndisliyi ixtisası üzrə 3-cü kurs tələbəsi Aqşin Qaraşlı; Ofis meneceri - neft mühəndisliyi ixtisası üzrə 3-cü kurs tələbəsi Rəşad Musayev; Katib - kimya mühəndisliyi ixtisası üzrə 2-ci kurs tələbəsi Zeynəb Fərzizadə.

İdarə heyətinin əzmlə çalışmasının, müxtəlif fəaliyyətlərin həyata keçirilməsi üzrə dinamik üsullardan istifadə etməsinin nəticəsidir ki, təşkilat öz məqsədlərini həyata keçirməyə nail olmuş, “2021-ci il üzrə Uğurlu Tələbə Təşkilatı Mükafatı”na layiq görülmüşdür.