2021-ci il aprelin 13-də Azərbaycan Respublikası Təhsil Nazirliyi və Azərbaycan Milli Erasmus Ofisinin təşkilatçılığı ilə Erasmus+ layihələrinin milli klaster görüşü keçirilmişdir. Görüşün məqsədi ali təhsil müəssiələrinin müasirləşməsi, əlçatanlığı, işədüzəlmənin təmin olunması və universitet-biznes əməkdaşlığının inkişaf etdirilməsində Erasmus+ layihələrinin təsirini müzakirə etmək və həmçinin ali təhsil müəssisələrini müxtəlif layihələr çərçivəsində birgə əməkdaşlığa sövq etmək olmuşdur.

Azərbaycan Milli Erasmus Ofisinin rəhbəri Pərviz Bağırov görüşü açmış və görüşün məqsədini iştirakçıların diqqətinə çatdırmışdır. Azərbaycan Respublikası Təhsil Nazirliyinin nümayəndəsi Vüsalə Qurbanova görüş iştirakçılarını salamlamış, Erasmus+ layihələrinin Azərbaycan ali təhsil müəssisələri üçün gətridiyi faydalar haqqında danışaraq, görüş iştirakçılarına uğurlar arzulamışdır. Klaster görüşü Azərbaycan Milli Erasmus Ofisinin əməkdaşı Zəfər Həsənovun moderatorluğu ilə davam etmişdir.

Tədbirdə beş Erasmus+ layihəsi (PICASP, WORK4CE, ECAR, UniClaD, UniLab) və layihə tərəfdaşları haqqında görüş iştirakçılarına geniş məlumat verilmiş və onların sualları cavablandırılmışdır. Təqdimatlardan sonra geniş müzakirələr başlamış və universitet nümayəndələri layihələr çərçivəsində və layihələrdən kənar birgə əməkdaşlıq imkanları və yollarını təklif etmişlər.

Xəzər Universiteti milli klaster görüşünə PICASP və UniLab layihəsinin tərəfdaşı kimi qatılmışdır. Universiteti Ülkər Bayramova, Səbinə Quliyeva və Elnurə Əhmədzadə təmsil etmişlər.