Martın 1-də Bakı Ali Neft Məktəbinin (BANM) və bp şirkətinin birgə təşkilatçılığı ilə baçlanan “Mühəndislər üçün biznes təhsili” layihəsinin növbəti kursu iki həftədən sonra başa çatıb.

Əsas məqsədi mühəndislik ixtisası üzrə təhsil alan tələbələrin liderlik və idarəetmə bacarıqlarının inkişaf etdirilməsi və karyera imkanlarının genişləndirilməsi olan layihədə iştirak etmək üçün ümumilikdə 300 nəfər müraciət etmişdi.

Onlardan yalnız mühəndislik ixtisasları üzrə təhsil alan 3-cü, 4-cü və 5-ci kurslarda təhsil alan və ingilis dili bacarıqları yüksək olan tələbələr seçilmişdi. Bakı Ali Neft Məktəbinin 4-ci və 5-ci kurs, digər ali təhsil müəssisələrinin isə 3-cü və 4-cü kurs tələbələrindən ibarət 80 nəfərlik iştirakçı kursa qəbul edilmişdi.

İştirakçılar Bakı Ali Neft Məktəbi, Azərbaycan-Fransız Universiteti (UFAZ), Bakı Mühəndislik Universiteti, Memarlıq və İnşaat Universiteti, Xəzər Universiteti, Bakı Dövlət Universitetini və Azərbaycan Dövlət Neft və Sənaye Universitetini təmsil edirdilər.

6 modulu (“Prezentasiya və kommunikasiya bacarıqları”, “Layihə idarəetməsi”, “Vaxtın idarəedilməsi və səmərəlilik”, “Risklərin idarə edilməsi”, “Maliyyə, büdcə və xərclərə nəzarət edilməsinə giriş”, “İnsan resurslarının idarə edilməsinin əsasları və liderlik”) əhatə edən kurs Bakı Ali Neft Məktəbinin beynəlxalq təcrübəli mütəxəssisləri tərəfindən onlayn qaydada və tam olaraq ingilis dilində aparılmışdır. Proqramın sonunda kursu uğurla bitirənlərə sertifikat verilmişdir.