2020-cu il dekabrın 23-də Microsot Teams platformasında Xəzər Universitetinin 48 və 49-cu onlayn məzunluq mərasimi keçirildi. Mərasimdə universitetin rəhbərliyi və əməkdaşları, məzunlar və valideynlər iştirak edirdilər.

Aparıcılar qonaqları salamladıqdan sonra sentyabrın 27-dən başlayan, 44 gün davam edən və işğal altındakı ərazilərimizin azad edilməsilə nəticələnən Vətən Müharibəsi haqqında məlumat verdilər. Bütün şəhidlərin xatirəsi bir dəqiqəlik sükutla yad olundu. Bildirildi ki, tariximizin ən parlaq səhifəsinə, Azərbaycan xalqının iftixar və qürur mənbəyinə çevrilən Vətən Müharibəsinin şəhid qəhrəmanları arasında Xəzərin iki tələbəsi də var.

Tədbir Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlının çıxışı ilə davam etdi. O, pandemiya şəraitində tədrisin təşkilində yaranan problemləri aradan qaldırmaq üçün Xəzər Universitetinin bütün resurslarını səfərbər etdiyini bildirdi. Universitetin öz məzunları ilə haqlı olaraq fəxr etdiyini qeyd etdi. Koronavirus pandemiyası dövründəki çətinliklərdən danışaraq bildirdi ki, bütün bunlara baxmayaraq “Xəzər”in məzunları vətəndə və dünyanın müxtəlif ölkələrində yüksək vəzifələrdə çalışır, yüksək peşəkarlıq nümayiş etdirirlər. Professor Hamlet İsaxanlı məzunlara yeni başlayacaqları həyat yollarında qarşıya çıxa biləcək təbii çətinlikləri aradan qaldırmaq üçün tövsiyələr verdi və onlara uğurlar arzuladı.

Sonra universitetin rektoru dosent İradə Xəlilova çıxış edərək, məzunları təbrik etdi, əmək və karyera yollarında onlara uğurlar arzuladı, universitetin professor-müəllim heyətinə əməklərinə görə təşəkkürünü bildirdi.

Fakültə dekanları məzunları təbrik etdilər, yeni həyatlarında onlara uğurlar arzuladılar.

Universitetin Multimedia mərkəzinin müvafiq fakültələrin tələbələrinin həyatına aid hazırladığı slayd-şoular nümayiş olundu.

Təbiət elmləri və mühəndislik fakültəsinin, İqtisadiyyat və menecment fakültələrinin məzunları Rza Hacıyev və Joyce Muduve Xəzər Universitetinin andını səsləndirdilər.

Ardınca “Xəzər”in himni səsləndirildi. Humanitar, təhsil və sosial elmlər fakultəsinin məzunu Sadiq Mirzəyevin cəbhədən Xəzər Universitetinin kollektivi üçün göndərdiyi video nümayiş etdirildi.

Məzunluq mərasimi xoş əhval-ruhiyyə ilə başa çatdı.