2019-cu il dekabrın 28-də Xəzər Universitetinin Mərmər salonunda Dünya Azərbaycanlılarının Həmrəyliyi Günü və Yeni il münasibətilə bayram şənliyi keçirildi. Tədbirdə universitetin rəhbərliyi və əməkdaşları iştirak edirdilər.

Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı çıxış edərək, cari ildə universitetin əldə etdiyi nailiyyətlərdən və gələn il üçün nəzərdə tutulan inkişaf perspektivlərindən danışdı, əməkdaşları təbrik etdi, onlara şəxsi həyatlarında və əmək fəaliyyətlərində uğurlar arzuladı.

Xəzər Universitetinin rektoru dosent İradə Xəlilova, İdarəetmə və tələbə işləri üzrə prorektor İsaxan İsaxanlı, İctimai əlaqələr və media üzrə direktor Əlövsət Əmirbəyli, Dillər və ədəbiyyatlar departamentinin müdiri, dosent Dilbər Zeynalova, Təbiət elmləri və mühəndislik fakültəsinin dekan müavini Fəxrəndə Əlimərdanova çıxış edərək, əməkdaşlara təbriklərini və xoş arzularını çatdırdılar.

Universitetin Tədris işləri üzrə prorektoru professor Məhəmməd Nuriyev bayram şamlarını yandırıb, tortu kəsdi.

Universitetin həmkarlar təşkilatı tərəfindən keçirilən lotereya vasitəsilə iştirakçılara uduş-hədiyyələri təşkilatın sədri Əlövsət Əmirbəyli təqdim etdi.

Universitetin Musiqi və incəsənət departamentinin müdiri, əməkdar müəllim, pianoçu Zülfiyyə Sadıqovanın rəhbərliyi ilə universitetin Kamera orkestrinin müşayiəti, vokalçılar - Müslüm Maqomayev adına Akademik Dövlət Filarmoniyasının solisti, Xəzər Universitetinin müəllimi Məhsəti Cabbarova və Bakı Musiqi Akademiyasının doktorantı Rüfət Piriyevin iştirakı ilə konsert proqramı təqdim olundu.

Əməkdaşlar rəqs edib, şənləndilər. Bayram tədbiri xoş əhval-ruhiyyə ilə başa çatdı.