2019-cu il dekabrın 25-də Xəzər Universitetinin şəhər mərkəzindəki korpusunda (B.Səfəroğlu küç. 122) AMEA Arxeologiya və Etnoqrafiya İnstitutunun əməkdaşı Əjdər Babazadə arxeologiyaya giriş fənninin qonağı oldu. Qonağın fənlərarası və innovativ metodoloji yanaşma ilə keçdiyi arxeologiyada daş və digər tapıntıların öyrənilməsi və təsvirinə həsr olunmuş təqdimatı tələbələrin ciddi marağına səbəb oldu. Xüsusilə, əyani olaraq daş və dəvəgözündən olan təcrübi materialları çəkilməsi prosesi tələbələrin arxeologiyanın maraqlı və rəngarəng istiqamətlərini qavramalarına müsbət təsir göstərdi. Fənnin müəllimi, AMEA-nın Arxeologiya və Etnoqrafiya İnstitutunun elmi işçisi Orxan Zamanovun nəzəri kursunun məntiqi sonu kimi tələbələrin əməli vərdişlərə yiyələnməsi baxımından, artefaktların təsviri və çizimi çox mühüm əhəmiyyət kəsb edir. Bütün tələbələr seçdikləri eksponat və tapıntıları ilk dəfə olmasına baxmayaraq, təsvir etməyə müvəffəq oldular. Dərsin sonunda xatirə şəkli çəkdirən tələbələr beynəlxalq təcrübəyə malik qonaq ilə fikir mübadiləsi apardılar və bir sıra suallara cavab tapdılar.