2019-cu il noyabrın 13-də Xəzər Universiteti Təbiət elmləri və mühəndislik fakültəsinin dekanı Dr. Hassan Niknafs noyabrın 7-dən 11-dək Macarıstanda keçirilmiş Dünya Robot Olimpiadasında ölkəmizi təmsil etmiş fakültənin tələbələrindən ibarət komandanın üzvləri ilə görüşdü. Dr. Hassan Niknafs tələbələri qazandıqları uğur münasibətilə təbrik etdi, onlara daha böyük uğurlar arzuladı və fakültə adından hədiyyələr təqdim etdi.
Qeyd edək ki, Macarıstanda dörd gün davam edən yarışın sonunda Təbiət elmləri və mühəndislik fakültəsinin tələbələri Tamerlan Abdullayev, Tuqay Abdullazadə və Səməd Cabbarlıdan ibarət komanda robototexnika sahəsində yenilikləri ilə tanınan ölkələri –Amerika Birləşmiş Ştatları, Cənubi Koreya, Hindistan, Tayland və Çini üstələyərək, 83 komanda arasında 33-cü yeri tutmağa müvəffəq olmuşdur. Komandaya kompüter mühəndisliyi ixtisası üzrə təhsil alan dördüncü kurs tələbəsi Emin Bayramov rəhbərlik edirdi.
Görüşdə, həmçinin, Təbiət elmləri və mühəndislik fakültəsində kompüter mühəndisliyi və kompüter elmləri ixtisasları üzrə təhsil alan birinci kurs tələbələri də iştirak edirdilər. Görüş zamanı müsabiqədə iştirak edən komandamıza rəhbərlik edən Emin Bayramov tələbələrlə müsabiqə ilə bağlı təəssüratlarını bölüşdü və tələbələrin suallarını cavablandırdı.