2019-cu il noyabrın 13-də Xəzər Universiteti Karyera Mərkəzinin təşkilatçılğı ilə universitetdə Böyük Britaniyanın ESU (The English-Speaking Union) təşkilatının tərəfdaşı olan Azerbaijan Public Speaking Competition (APSC) platformasının iştirakı ilə Azərbaycanda tələbələr arasında ingilis dilinin təbliği və onların beynəlxalq proqramlarda iştirakını təmin etmək məqsədilə görüş keçirildi. Karyera Mərkəzinin koordinatoru Fəxrəddin Abdullayev çıxış edərək, bu proqramın əhəmiyyəti və tələbələrin gələcək karyeralarında hansı imkanları yaradacağı barədə məlumat verdi.
Platformanın layihə meneceri Lalə Babayeva proqram haqqında ətraflı məlumat verdi və bildirdi ki, Böyük Britaniyanın ESU təşkilatı dünyanın ən böyük natiqlik yarışması olan “International Public Speaking Competition-2020” beynəlxalq proqramının Azərbaycan üzrə milli yarışını həyata keçirir.
Qeyd edək ki, proqramın ilkin mərhələsində 15 nəfər finalçı müəyyən olunacaq. Dekabrın 1-də isə final mərhələsinin qalibi Azərbaycanın ən yaxşı natiqi statusunu qazanaraq, 2020-ci il mayın 11-dən 15-dək Londonda dünyanın ən yaxşı natiqi adını qazanmaq uğrunda 53 ölkədən olan qaliblərlə yarışacaq.
Görüş tələbələrin suallarını cavablandırmaqla başa çatdı.