2019-cu il noyabrın 4-də Xəzər Universitetinin Beynəlxalq Əlaqələr Şöbəsinin təşkilatçılığı ilə Universitetin Mərmər Zalında “Xəzər”də qlobal imkanlar” adlı tədbir keçirildi. Tədbirin məqsədi Universitetin tələbə və müəllim heyətinə Xəzər Universitetinin onlar üçün yaratdığı beynəlxalq layihələrdə və mübadilə proqramlarında iştirak imkanları barədə məlumat vermək, eləcə də, xarici universitetlərdə mübadiə müddətlərini başa çatdırmış tələbələr üçün öz təcrübələrini digər tələbələrlə bölüşməyə şərait yaratmaq idi.

3 saat davam edən tədbirdə həm universitetin heyəti, həm də tələbələr təqdimatlarla çıxış etdilər. Xəzər Universitetinin rektoru, dosent İradə Xəlilova tədbiri giriş sözü ilə açaraq, tələbələrə uğurlar arzuladı.

Sonra Beynəlxalq Əlaqələr Şöbəsinin koordinatoru Lamiyə Pənahova universitetin tərəfdaş olduğu Erasmus+ mübadilə proqramları, ikitərəfli mübadilə proqramları, Mevlana proqramı və ikili diplom imkanları haqqında təqdimatla çıxış etdi. O, həmçinin, tələbələrin müraciət qaydaları, tələblər, son müraciət tarixləri kimi suallarını da cavablandırdı.

İnkişaf Mərkəzinin direktoru Raziyə İsayeva British Council tərəfindən dəstəklənən “Creative Spark” proqramı haqqında və Xəzər Universitetinin yeni qazandığı bu çərçivədə layihə haqqında təqdimatla çıxış edərək, tələbələrin orada iştirak imkanları haqqında tələbələrə məlumat verdi. Öz növbəsində Psixologiya departamentinin müəllimi Nilufər Əlizadə tələbələrə Xəzər Universitetinin təşkil etdiyi “hackathon” tədbiri və tələbələrin orada iştirak imkanları barədə məlumatı tələbələrlə bölüşdü.

Tələbələr də öz təqdimatlarını nümayiş etdirdilər. Xəzər Universitetinin doktorantı Moozhan Serpoush İspaniyanın Cadiz Universitetində Erasmus+ mübadilə tələbəsi olaraq öz təcrübələrini bölüşdü və tələbələrə orada vaxtlarını səmərəli keçirmək üçün məsləhətlər verdi. Digər bir doktorant tələbə Maryam Adli də Xəzər Universitetində magistr tələbəsi olduğu müddətdə Türkiyənin Selçuk Universitetində Mevlana mübadilə tələbəsi kimi, təcrübəsini bölüşərək, tələbələrin suallarını cavablandırdı. Xəzər Universitetində hazırda mübadilə tələbəsi olaraq təhsil alan İnönü Universitetinin tələbəsi Murat Can Işık da Türkiyədə təhsil sistemi haqqında təqdimatla çıxış edərək, orada yataqxananın tapılması, büdcənin idarə olunması və görüləsi yerlər barədə məlumat verdi. Xəzər Universitetində mübadilə tələbəsi olaraq təhsil alan digər bir tələbə –Almaniyanın Tübingen Universitetindən Özgü Gürgör də öz universitetində təhsil və tələbə həyatı barədə təqdimatla çıxış etdi və tələbələrin Tübingen şəhəri haqqında suallarını cavablandırdı.