2019-cu il oktyabrın 28-də Xəzər Universitetinin Psixologiya departamentinin müəllimi və doktorantı Nilufər Əlizadənin təşkilatçılığı ilə psixologiya ixtisasının tələbələri sosial layihə çərçivəsində Daun Sindromlu Şəxslərin Reabilitasiyası mərkəzində oldular. Layihənin məqsədi ilk növbədə Daun sindromunun xəstəlik yox, genetik fərqlilik olmasına diqqət çəkmək, mərkəzdə reabilitasiya görən uşaqlarla zaman keçirmək, onların sosiallaşmasında rol oynamaq və ən əsası, tələbələrin kitabdan öyrəndiyi bilikləri canlı olaraq göstərmək idi. Layihədə iştirak edən 2-4-cü kurs tələbələri Daun Sindromlu Şəxslərin Reabilitasiyası Mərkəzində uşaqların keçirdikləri prosedurları –loqopedlə canlı seanslarını, rəsm, əmək, xalçaçılıq, musiqi və rəqs dərslərini birbaşa olaraq izləmək şansı əldə etməklə yanaşı, həm də uşaqlarla canlı ünsiyyətdə olaraq gələcəyin psixoloqları kimi bu uşaqların cəmiyyətdə formalaşmasında onların vacib rolu olduğunu bir daha dərk etdilər. Daha sonra tələbələr bir qrup uşaqla birlikdə kulinariya dərsində tort hazırlayaraq, bu uşaqların da sevgi dolu və mehriban olduqlarının şahidi oldular.

Xəzər Universitetinin Psixologiya departamentində tələbələr ilə ənənəvi hal alan sosial layihələrin əsas məqsədi tələbələri mövcud qlobal problemlərə duyarlı şəkildə yetişdirmək və gələcək karyeralarında hər zaman bu məsuliyyəti dərk edərək, fəaliyyət göstərmələrini təmin etməkdir.

Sonda Daun Sindromlu Şəxslərin Reabilitasiya Mərkəzinin direktoru Natella Həsənova belə layihələr vasitəsilə uşaqlara göstərilən qayğı və diqqətin əhəmiyyətli olduğunu vurğulayaraq, iştirakçılara təşəkkürünü bildirdi.