2019-cu il oktyabrın 25-də Xəzər Universitetinin Fikrət Əmirov Konfrans-Konsert Mərkəzində universitetin Dillər və ədəbiyyatlar departamentinin müdiri, Tələbə Qəbulu üzrə Dövlət Komissiyasının ilk sədri olmuş ədəbiyyatşünas alim, ictimai-siyasi xadim Vurğun Əyyubun doğum günü münasibətilə ədəbi-bədii tədbir keçirildi. Tədbirdə universitetin rəhbərliyi, əməkdaşları və tələbələr, elmi və ədəbi ictimaiyyətin nümayəndələri, Vurğun Əyyubun ailə üzvləri iştirak edirdilər.

Nəsiminin “Ayrılır” rədifli qəzəli ilə başlanan zəngin kompozisiyalı tədbirdə Vurğub Əyyubun da şeirləri daxil olmaqla tələbələrin ifasında şairlərin şeirləri səsləndi, musiqi nömrələri təqdim olundu. Xəzər Universitetinin Musiqi və incəsənət departamentinin müdiri, əməkdar müəllim Zülfiyyə Sadıqovanın pianoda müşayiəti ilə universitetin tələbəsi Şəmsiyyə Cəfərli “Ayrılıq” mahnısını, Aşıq Şəhriyar sazda aşıq havalarını ifa etdilər. Tədbir boyu Vurğun Əyyubun Xəzər Universitetindəki fəaliyyətini əks etdirən slayd-şoular nümayiş olundu.

Tədbirdə Xəzər Universitetinin rektoru dosent İradə Xəlilova çıxış edərək, Vurğun Əyyubu səriştəli departament müdiri, tələbələrini özünə övlad bilən qayğıkeş müəllim kimi səciyyələndirdi.

Tədbirdə millət vəkili Aqil Abbas, professorlar Qulu Məhərrəmli, Bədirxan Əhmədov, Əli Şamil, şair Elnaz Eyvaz, Türkiyə səfirliyinin mətbuat katibi Hüseyin Altınalın, Xəzər Universitetinin Humanitar, təhsil və sosial elmlər fakültəsinin dekanı Elza Səmədli çıxış edərək, Vurğun Əyyubla bağlı xatirələrini bölüşdülər.

Tədbir Vurğun Əyyubun xatirəsinə dərin ehtiramla başa çatdı.