2019-cu il oktyabrın 15-dən 18-dək Xəzər Universitetinin Həyat elmləri departamentinin və Azərbaycan Tibb Universitetinin təşəbbüsü ilə CRISPR texnologiyası ilə əlaqəli Azərbaycanda ilk dəfə olaraq, “CRISPR texnologiyası ilə genom redaktəsinin dizaynı və tətbiqi” mövzusunda elmi-praktiki təlim kursu həyata keçirildi. Təlim Yaponiyanın Osaka Universitetinin və İranın Zəncan Tibb Universitetinin Xərçəngin Gen Terapiya Araşdırma Mərkəzinin alimi Dr. Saeed Koboli tərəfindən aparıldı. Məruzə Azərbaycanın müxtəlif elmi mərkəzlərində, o cümlədən, Xəzər Universiteti, Azərbaycan Baytarlıq Elmi Tədqiqat İnstitutu, AMEA Genetik Ehtiyatlar İnstitutu, Azərbaycan Respublikasının Qida Təhlükəsizliyi İnstitutu, Azərbaycan Tibb Universiteti, Bakı Dövlət Universiteti, AMEA Molekulyar Biologiya və Biotexnologiyalar İnstitutu, Bakı Mühəndislik Universiteti, Hind Klinikası, Nüvə Təbabət Mərkəzi və AZAL-da fəaliyyət göstərən alimlərin, mütəxəssislərin və tələbələrin iştirakı ilə böyük maraqla dinlənildi. Kursu genomun redaktə texnologiyalarının əsasları, CRISPR-Cas9 sisteminin quruluşu və mexanizmi, CRISPR-in tədqiqat laboratoriyalarında və tibb sahələrində istifadəsi, CRISPR-Cas-ın erkən diaqnostikada, müalicədə və sənaye biotexnologiyasında tətbiqi, CRISPR-Cas əsaslı genom mühəndisliyində klonlaşdırma, transfeksiya və redaktə, CRISPR-Cas komponentlərinin çatdırılması (Nano-çatdırılma) və CRISPR-in etik problemləri kimi maraqlı yeni elmi mövzular əhatə edirdi. Eyni zamanda, iştirakçılara sgRNT-in (single guide RNA) CHOPCHOP proqramı vasitəsilə necə dizayn olunması praktiki olaraq ətraflı öyrədildi. Təlim kursu ümumilikdə interaktiv keçərək hər günün sonunda iştirakçılar tərəfindən qiymətləndirildi.

Tədbirin materiallarını buradan yükləmək olar.