2019-cu il avqustun 14-dən 28-dək Xəzər Universitetinin Beynəlxalq Əlaqələr Şöbəsinin koordinatoru Abutab Abbasova Avstriyanın Alpbach şəhərindəki Avropa Forumunda təqaüd qazanaraq, iştirak etdi. Sözügedən forumda müxtəlif sahələrdə işləyən elmi işçilər, professorlar, praktikantlar və təqaüdçülər siyasi, sosial, iqtisadi və təbiət ilə bağlı mövzuları müzakirə etmək üçün 1945-ci ildən bəri hər ay toplaşırlar. Bu il 96 ölkədən gənclər Alpbach şəhərində “Azadlıq və Təhlükəsizlik” mövzusunun müzakirəsi ilə bağlı yığışmışdılar.

Bu müddətdə Abutab Abbasova Avstriyanın Prezidenti Alexander Van der Bellen, kansler Brigitte Bierlein, BMT-nin keçmiş Baş katibi Ban Ki-Moon, məşhur iqtisadiyyatçılar və Kolumbiya Universitetinin professorları Cozef Stiqlits və Cefrey Saks, Dünya Ticarət Təşkilatının sabiq direktoru Paskal Lami, Aİ-nin Xarici İşlər və Təhlükəsizlik Siyasəti, Avropa Qonşuluq Siyasəti və Genişlənmə Danışıqları üzrə Mətbuat katibi Maja Kocijancic, Avropa Xarici Fəaliyyət Xidmətinin keçmiş İcraçı direktoru Tomas Mayr-Hartinq və digəriləri ilə görüşmüş və onların mühazirələrində aktiv iştirak etdi. O, həmçinin “Beynəlxalq Tədbir”də fərqli ölkələrdən gələn bir sıra gənclərlə səhnədə iştirak etdi, gündəlik həyatda olan süni sərhədlər mövzusuna diqqət çəkdi. A.Abbasova bütün gəncləri Avropa Forumunda iştirak etməyə dəvət etdi.