2019-cu il sentyabrın 11-də Xəzər Universiteti Tarix və arxeologiya departamentində “Azərbaycan arxeologiyası” jurnalının növbəti sayının çapa hazırlanması ilə əlaqədar redaksiya heyətinin iclası oldu. İclasda jurnalda çap olunması gözlənilən məqalələrə baxış keçirildi, jurnalın saytının, beynəlxalq standart və göstəricilərinin daha da təkmilləşdirilməsi, o cümlədən, redaksiya heyətində dəyişikliklər və ora yeni gənc kadrların cəlb olunması məsələləri müzakirə edildi. Həmçinin, iclasda jurnalın baş redaktoru professor Qüdrət İsmayılzadənin “Biblioqrafik məlumat toplusu”, baş redaktorun müavini Tarix Dostiyevin “Arxeoloji lüğət” adlı yeni çap olunmuş kitabları da təqdim olundu.

İclasda Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı, Tarix və arxeologiya departamentinin müdiri dosent Roza Arazova, Jurnalın baş redaktoru, professor Qüdrət İsmayılzadə, baş redaktorun müavinləri Bəhlul İbrahimli və Tarix Dostiyev, Tarix və arxeologiya departamentinin müəllimi Orxan Zamanov, assistent Kəmalə Mustafayeva iştirak edirdilər.