2019-cu il sentyabrın 16-da Xəzər Universitetində 2019/2020-ci tədris ilinin açılışı oldu. Xəzər Universitetinin himninin ifasından sonra universitetin təsisçisi, Direktorlar və Qəyyumlar Şurasının sədri professor Hamlet İsaxanlı nitq söylədi, universitetə yeni qəbul olunmuş tələbələri, onların valideynlərini təbrik etdi, uğurlar arzuladı.

Xəzər Universitetinin rektoru dosent İradə Xəlilova da çıxış edərək, universitetdə tələbələr üçün yaradılan təhsil şəraiti və onların hərtərəfli inkişafını təmin edən proqramların həyata keçirilməsindən danışdı.

Professor Hamlet İsaxanlı, dosent İradə Xəlilova, Təbiət elmləri və mühəndislik fakültəsinin dekanı Hassan Niknafs, İqtisadiyyat və menecment fakültəsinin dekanı Ceyhun Məmmədov və Humanitar, Təhsil və sosial elmlər fakültəsinin dekanı Elza Səmədova universitetin müxtəlif ixtisaslarına yüksək ballla qəbul olunmuş tələbələrə tələbə biletləri və qiymətli hədiyyələr təqdim etdilər.

Universitetə qəbul olunmuş tələbələr adından Nicat Hacıyev çıxış edərək, onlara göstərilən etimadı uğurlu təhsilləri ilə doğruldacaqlarını bildirdi.

Sonra universitetin İdarəetmə və tələbə işləri üzrə prorektoru dosent İsaxan İsaxanlı yeni qəbul olunmuş tələbələri auditoriyalara dəvət etdi.

Tədbirdə Xəzər Universitetinin rəqs ansamblı və Xəzər Universitetinin müəllimi, M.F.Axundov adına Akademik Opera və Balet Teatrının solisti Məhsəti Cabbarlı müxtəlif rəqs və musiqi nömrələri ilə çıxış etdilər.