Xəzər Universiteti Psixologiya departamentinin koordinatoru Mələk Kərimovanın təşkilatçılığı ilə psixologiya ixtisasının bir qrup tələbəsi iyulun 29-dan avqustun 26-dək Türkiyənin paytaxtı Ankarada ən tanınan xəstəxanalardan biri olan Özel Boylam xəstəxanasında professor Ertuğrul Köroğlunun rəhbərliyi ilə təşkil edilən yay təcrübə proqramında  iştirak edərək, vətənə qayıdıblar.

Tələbələrin xüsusi maraqla qatıldıqları və peşə inkişafı cəhətdən əhəmiyyətli olan yay təcrübə proqramında onlar hər gün nəzəri dərslər keçməklə yanaşı, psixi pozuntusu və maddə asılılığı olan xəstələrlə birbaşa ünsiyyətə girərək, praktiki təcrübə və bacarıqlarını daha da artırdılar. Yay təcrübə proqramında DSM-5 təsnifatına əsasən psixi xəstəliklərin diaqnozu prosesində həftədə üç dəfə birbaşa görüşlərdə iştirak edən tələbələr, eyni zamanda, psixoloji testlər ilə əlaqəli də məlumatlandırıldılar. Qrup  və fərdi terapiyalarda müşahidələr aparan tələbələr psixoloji konsultasiyanın zəruri prinsiplərini də öyrənirdilər.
Xəzər Universiteti Psixologiya departamenti tələbələrdə peşə bacarıqlarının formalaşdırılması məqsədi ilə belə praktikaların təşkilinə dəstək olaraq əmək bazarına cavab verən kadrların yetişdirlməsinə öz töhfəsini verməyə davam edəcək.