2019-cu il aprelin 12-də Bakıda Erasmus+ proqramı çərçivəsində NİZAMİ layihəsinin məlumat günü keçirildi. NİZAMİ layihəsi öz işinə 2015-ci ilin oktyabrında başlamış və cari ilin aprelində başa çatmışdır. Bu layihədə Azərbaycan və Avropa Birliyinin tərəfdaş universitetləri, Azərbaycan Milli Elmlər Akademiyası və eləcə də, Təhsil Nazirliyi iştirak edirdilər.
NİZAMİ layihəsinin məlumat gününün əsas məqsədi üç il yarım ərzində davam etmiş layihənin nəticələri barədə ali təhsil müəssisələrinə və ictimaiyyətə məlumat vermək idi.
Aprelin 12-si Bakıda keçirilən məlumat günündə Azərbaycanda Fransa səfirliyinin əməkdaşlıq və mədəniyyət üzrə müşaviri Johan Şitterer, Milli Erasmus+ ofisinin rəhbəri Pərviz Bağırov, Təhsil Nazirliyinin aparat rəhbərinin müavini Yaqub Piriyev, AMEA-nın akademik katibi, İnformasiya Texnologiyaları İnstitutunun direktoru akademik Rasim Əliquluyev çıxış edərək, NİZAMİ layihəsinin Azərbaycanda doktorantura təhsilinin təkmilləşdirilməsində əhəmiyyətini vürğuladılar. Təhsil Nazirliyinin Elm sektorunun müdiri Anar Kazımov “NİZAMİ layihəsi: əldə olunmuş nəticələr və yeni perspektivlər” mövzusunda çıxış etdi. Qeyd olunduğu kimi, NİZAMİ layihəsinin mühüm hədəflərindən biri universitetlərdə doktorantura məktəblərinin yaradılması idi. Bu hədəfə çatmaq üçün Azərbaycanda yalnız Xəzər Universiteti pilot layihə kimi öz Doktorantura Məktəbi modelini hazırlayaraq, NİZAMİ layihəsinin ikinci ilində tərəfdaş universitetlərə təqdim etmiş və layihənin sonuncu ilində isə artıq bu məktəbləri yaratmışdır.
NİZAMİ layihəsinin məlumat günündə Xəzər Universiteti hesabat verərək, doktorantura məktəbinin yaranmasını, strukturunu, missiyasını, hədəflərini və işləmə mexanizmini ictimaiyyətə çatdırdı. Həmçinin, universitetdə NİZAMİ layihəsi çərçivəsində Magistr Və Doktorant Tələbələr Birliyinin artıq 2017-ci ildə yaranmasını və tələbələrin bu birlikdə aparılan görüşlərinin əhəmiyyətini qeyd etdi. NİZAMİ layihəsinin məlumat günündə Xəzər Universitetinin əməkdaşları –rektor dosent İradə Xəlilova, İnkişaf Mərkəzinin direktoru Raziyə İsayeva, İqtisadiyyat və menecment fakültəsinin dekanı Dr. Ceyhun Məmmədov, Siyası elm və fəlsəfə departamentinin müdiri Dr. Elmar Mustafayev və həmçinin, doktorant tələbələri iştirak edirdilər.