“Xəzər Universitetində təhsil almaq özümə inamımı artırır,” –Xəzər Universitetinin Rusiyadan olan magistr tələbəsi Kristina Reçkunova deyir. Kristina Xəzər Universitetinin beynəlxalq təqaüd proqramı çərçivəsində maliyyə menecmenti üzrə təhsil alır.

Kristina bildirir ki, magistr təhsili almaq üçün düzgün universiteti seçmək onun üçün elə də asan bir proses olmayıb: “Qərar vermək xeyli vaxtımı aldı. Mənim üçün çox vacibdir ki, təhsil aldığım universitet yüksək təhsil versin və şəxsi inkişaf üçün münbit mühit yaratsın. Mən həm də Azərbaycanı kəşf etmək istəyirdim, çünki atam bu ölkədə doğulub. Buna görə də, mən Azərbaycanda təhsil alan tələbələrdən məsləhət almağa, onlayn forumlarda tələbələrin şəxsi təcrübəsini öyrənməyə başladım. Ehtiyatlı araşdırmalardan sonra nəhayət, Xəzər Universitetinə müraciət etməyə qərar verdim və qərarım məni yanıltmadı.

Xəzər Universiteti gözləntilərimin də üstündə oldu. Dərslər çox canlı və interaktiv keçirilir, bütün dərs boyu biz müzakirələr aparır və fikirlərimizi rahat ifadə edirik. Mən bu yaxınlarda öndə gedən audit şirkətlərindən birində müsahibədə oldum və onlar çox təəccübləndilər ki, mən sadəcə universitetdən əldə etdiyim biliklərlə müsahibədə verilən bütün suallara cavab verdim. Həqiqətən də, öz sahəmə dair bir çox bilikləri Xəzər Universitetində əldə etmişəm və bu da mənə müsahibə zamanı özgüvən verirdi”. Kristinanın tam müsahibəsini buradan oxumaq mümkündür.

Qeyd edək ki, Kristina Reçkunova ilə aparılan müsahibə universitetin Beynəlxalq əlaqələr ofisinin təşkil etdiyi “Dünya və Xəzər” layihəsi çərçivəsində baş tutmuşdur. Layihə çərçivəsində Xəzər Universitetinin əcnəbi tələbələrindən silsilə müsahibələr götürülür.