2019-cu il martın 15-də Türkiyə Cümhuriyyəti Mimar Sinan Universitetinin prorektoru professor Süleyman Karataş Xəzər Universitetinin qonağı oldu. Görüş əsnasında professor Süleyman Karataş Humanitar, təhsil və sosial elmlər fakültəsinin dekanı dosent Elza Səmədovanın müşayətilə universiteti gəzdi, dizayn ixtisasında oxuyan tələbələrlə görüşdü və onların işləri ilə tanış oldu. Daha sonra Xəzər Universitetinin rektoru dosent İradə Xəlilova ilə görüşən qonağa Xəzər Universiteti və gələcəkdə əməkdaşlıq haqqında məlumatlar verilərək, fikir mübadiləsi aparıldı. Görüşdə Xəzər Universitetinin Tədris işləri üzrə prorektoru professor Məhəmməd Nuriyev, Humanitar, təhsil və sosial elmlər fakültəsinin dekanı dosent Elza Səmədli, Musiqi və incəsənət departamentinin rəhbəri dosent Zülfiyə Sadıqova, departamentin müəllimi, dizayn ixtisasının koordinatoru Afaq Kərimova və universitetin Beynəlxalq əlaqələr şöbəsinin müdiri Turan Cəfərova iştirak edirdilər.

Daha sonra qonaq, Mədəniyyət Mərkəzində təşkil olunmuş çay süfrəsində Xəzər Universitetinin Kamera Orkestrinin ifasını dinlədi, qonağa Xəzər Universitetinin simvolizə edən hədiyyələr təqdim olundu. Professor Süleyman Karataş öz növbəsində Xəzər Universiteti rəhbərliyinə qonaqpərvərlik üçün təşəkkür edərək, iki universitet arasında əməkdaşlığın möhkəmlənməsi üçün səy göstərəcəyini vurğuladı.