2019-cu il martın 8-dən 10-dək Xəzər Universiteti Təbiət elmləri və mühəndislik fakültəsinin bir qrup tələbə və işçi heyəti AMEA-nın Nəsirəddin Tusi adına Şamaxı Astrofizika Rəsədxanasında (ŞAR) keçirilən “Tələbələr üçün astronomiya qış məktəbi”ndə iştirak etdilər.

Azərbaycan Respublikası Gənclər Fondu tərəfindən XI qrant müsabiqəsi çərçivəsində maliyyələşdirilən layihə ŞAR, “Azərkosmos” ASC, Tusi-Bohm Planetarium və “AstroKlub” tələbə dərnəyinin birgə təşkilatçılığı ilə reallaşdırıldı. Tədbirin əsas məqsədi tələbələrin astronomiya və kosmos elminə maraqlarını artırmaq idi.

Üç gün davam edən qış məktəbində Xəzər Universitetinin tələbələri ilə birgə Bakı Dövlət Universiteti, ADA Universiteti, Milli Aviasiya Akademiyası, Moskva Dövlət Universitetinin Bakı filialı, Bakı Mühəndislik Universiteti, Qərbi Kaspi Universitetində təhsil alan 30-dan çox tələbəyə ŞAR-ın əməkdaşları tərəfindən astronomiyanın müxtəlif sahələrini əhatə edən məruzələr oxundu və onların sualları cavablandırıldı. Tələbələr, həmçinin, “Azərkosmos” ASC-də təşkil edilmiş seminarda da iştirak etdilər.

Sonda qış məktəbinin iştirakçılarına sertifikatlar təqdim edildi.