2019-cu il martın 6-da Xəzər Universitetinin şəhər mərkəzindəki kampusunda (Bəşir Səfəroğlu küç.122) ənənəvi “Elm və Sənət Məclisi”nin 70-ci məşğələsi keçirildi. Məşğələni giriş sözü ilə universitetin təsisçisi, Direktorlar və Qəyyumlar Şurasının sədri professor Hamlet İsaxanlı açaraq, İngiltərədən dəvət olunmuş “The Polymath” kitabının müəllifi, “Khalili Collection”-un bədii rəhbəri, FIRST jurnalının diplomatik müxbiri Waqas Ahmed haqqında geniş məlumat verdi.
Sonra W.Ahmed Londonda yerləşən “Khalili” kolleksiyası, oradakı qiymətli əsərlər haqqında geniş məlumat verdi. O, “Khalili” kolleksiyasına məxsus qədim İslam dövrünə aid qiymətli əsərlərin video görüntülərini nümayiş etdirdi. Tədbirdə Xəzər Universitetinin müəllimləri və dizayn ixtisası üzrə təhsil alan tələbələri, Bakı şəhərində fəaliyyət göstərən 28 muzeyin nümayəndələri və digər şəxslər iştirak edirdi. Məruzə ətrafında müzakirələrdə Fəxriyyə Əliyeva (İstiqlal Muzeyi), Hamlet İsaxanlı (Xəzər Universiteti), Məlahət Fərəcova (Qala Qoruğu), Afaq Kərimova, Hassan Niknafs, Əlövsət Əmirbəyli (Xəzər Universiteti) və digərləri iştirak etdilər.
Sonda Waqas Ahmed bütün iştirakçılara və şəxsən professor Hamlet İsaxanlıya dərin təşəkkürlərini bildirdi. O, “Khalili Collection”dan gətirdiyi qiymətli hədiyyəni H. İsaxanlıya təqdim etdi.