2019-cu il fevralın 24-də Xəzər Universiteti İqtisadiyyat və menecment fakültəsi və Milli Mühasiblər Forumunun növbəti seminarı keçirildi. Bu dəfəki seminarda da mühasibat uçotu sahəsinin tanınmış mütəxəssisləri çıxış edirdilər.

Seminarı giriş sözü ilə açan Milli Mühasiblər Forumunun Təşkilat Komitəsinin sədri Dr. Ruslan Atakişiyev Forumun fəaliyyət prinsipləri və tədbirin keçirilməsi məqsədi barəsində iştirakçıları məlumatlandırdı. Daha sonra Xəzər Universitetinin İqtisadiyyat və menecment fakültəsinin dekanı Dr. Ceyhun Məmmədov seminar iştirakçılarını salamladı, Xəzər Universitetinin elm və təhsil sahələrindəki fəaliyyətləri və mühasibat uçotunun tədrisi haqqında iştirakçılara məlumat verdi.

Həmçinin, seminarda Bakı Hesabat Mərkəzinin direktoru Mehdi Babayev “Sənədsiz malların (sənəd olmadan alınan və rəsmi uçotdan kənarda qalan əsas vəsaitlərin, xammal və materialların, malların və digər maddi əşyaların) daxil edilməsinin sənədləşdirilməsi, qiymətləndirilməsi, rəsmi uçota alınması, silinməsi üsulları və problemlərin həlli”, İqtisadi Araşdırmalar və Tədris Mərkəzinin vitse-prezidenti Radil Fətullayev “Mənfəət vergisi və gəlir vergisi üzrə cari (rüblük) vergi ödəmələrinin hesablanması və cari vergi məbləği barədə arayışın tərtib və təqdim edilməsi, problemlərin həlli”, AccessBankın bank mütəxəssisləri isə “İdxal-ixrac və digər valyuta əməliyyatları üzrə bank hesablaşmalarında yaranan çətinliklər və onların aradan qaldırılması yolları, idxal-ixrac əməliyyatları, müqavilələrin hazırlanması, avans ödənişləri, vasitəçilik, 3-cü şəxsin xeyrinə ödənişlər, xaricdən cəlb edilmiş kreditlər və digər borc öhdəlikləri ilə bağlı köçürmələr və s.-lə bağlı yaranan problemlər, xarici valyuta əməlıyyatlarının dövlət tənzimlənməsi” mövzularında çıxış etdilər.

Daha sonra iştirakçıları maraqlandıran suallar cavablandırıldı və mövzular ətrafında müzakirələr aparıldı.

Seminarda bir sıra tanınmış müəssisələrin baş mühasibləri, mühasibləri və maliyyə menecerləri, universitet müəllimləri və tələbələri iştirak edirdilər.