2019-cu il fevralın 28-də Xəzər Universitetinin rektoru vəzifəsini icra edən Dr. İradə Xəlilovanın sədrliyi ilə Elmi Şuranın 2018-2019-cu dərs ili ərzində ikinci iclası keçirildi. İclası giriş sözü ilə açan Dr. İradə Xəlilova Elmi Şuranın üzvlərini gündəliklə tanış etdi və şuranın yeni tərkibi haqqında məlumat üçün sözü universitetin Akademik işlər üzrə prorektoru professor Məhəmməd Nuriyevə verdi. Məhəmməd Nuriyev son dövrlər universitetdə aparılan struktur dəyişiklikləri ilə bağlı Elmi Şuranın yeni formalaşmış tərkibini şura üzvlərinin nəzərinə çatdırdı.
Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı iclasda çıxış edərək, Xəzər Universitetində aparılan son struktur dəyişikliklərini zəruri edən səbəblər və universitetin strateji inkişaf istiqamətləri barədə öz mülahizələrini söylədi. O, ilk növbədə Xəzər Universitetində çalışan hər kəsdən yüksək peşəkarlıq, fəallıq və dürüstlük kimi keyfiyyətlərin tələb olunduğu bildirdi. Dünya təhsil sisiemində Xəzər Universitetinin öz layiqli yerini tutması üçün onun daim müasirləşməyə ehtiyacının olduğunu və bu məqsədlə əməkdaşlar arasında ingilis dilini yaxşı bilən kadrlara xüsusi üstünkük veriləcəyini, eləcə də, ingilis dilində tədris olunan fənlərin sayını artırmağın zəruri olduğunu nəzərə çatdırdı. Pofessor Hamlet İsaxanlı, həmçinin, qeyd etdi ki, tələbələrlə aparılan işin keyfiyyəti yüksəldilməli və onların rəy sorğularına verdiyi cavablara diqqətlə yanaşılmalıdır. H.İsaxanlı çıxışının sonunda Xəzər Universitetinin əməkdaşları arasında keçirilmiş sorğuya əsasən, kollektivin daha çox rəğbət qazanmış aşağıdakı üzvlərinə xüsusi sertifikat və mükafatlar təqdim etdi. Riyaziyyat departamentinin müdiri Əli Hüseynli; İqtisadiyyat və menecment fakültəsinin dekanı Ceyhun Məmmədov; Kompüter elmləri departamentinin müdiri Məhəmməd Şərifov; İqtisadiyyat və menecment departamentinin koordinatoru Bahadır Baysal, rektor vəzifəsini icra edən İradə Xəlilova; Hüquq departamentinin müdiri Cabir Xəlilov; Humanitar, təhsil və sosial elmlər fakültəsinin dekan müavini Validə Kərimova; Tarix və arxeologiya departamentinin müdiri Roza Arazova; Təbiət elmləri və mühəndislik fakültəsinin tələbə işləri üzrə dekan müavini Vəfa Aslanova; İnkişaf direktoru Raziyə İsayeva; Magistratura; Doktorantura və elmi işlər bölməsinin koordinatoru Cabir Məmmədli; Kitаbxana-İnformasiya Mərkəzinin direktoru Tatyana Zaytseva; Təsərrüfat işləri üzrə menecer Məleykə Hüseynova; İnformasiya texnologiyaları şöbəsinin müdiri Fərid Musayev; Qəbul və tələbə şöbəsinin müdiri Lаmiyə Nаmаzоvа; Kitabxana-İnformasiya Mərkəzinin direktor müavini Aytac Misgərli mükafatlandırıldılar.
Gündəlikdə duran ikinci məsələ ilə bağlı Akademik işlər üzrə prorektor professor Məhəmməd Nuriyev çıxış edərək, 2018-2019-cu tədris ilinin qış imtahan sessiyasının nəticələri və yaz semestri üçün qarşıda duran vəzifələr barədə geniş məlumat verdi. Elmi Şura üzvləri müzakirə olunan məsələlərlə bağlı öz fikirlərini söylədilər.