2019-cu il martın 1-də Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlının doğum günü münasibətilə tədbir keçirildi. Tədbirdə universitetin rəhbərliyi, dekanlar, departament müdirləri, əməkdaşlar və qonaqlar iştirak edirdilər.
Tədbirdə universitetin Elmi işlər üzrə prorektoru, rektor vəzifəsini icra edən dosent İradə Xəlilova təbrik nitqi söyləyərək, professor Hamlet İsaxanlıya gül dəstəsi təqdim etdi.
Universitetin Tədris işləri üzrə prorektoru professor Məhəmməd Nuriyev çıxış edərək, professor Hamlet İsaxanlının çoxşaxəli fəaliyyətindən - təhsil qurucusu kimi nümunəvi universitet yaratmasından, çoxşaxəli elmi və bədii yaradıcılığından danışdı, ona gələcək fəaliyyətində uğurlar arzuladı.
Üzeyir Hacıbəyli adına Musiqi Akademiyasının professoru, əməkdar incəsənət xadimi, bəstəkar Elnarə Dadaşova çıxışında professor Hamlet İsaxanlını doğum günü münasibətilə təbrik etdi, şeirlərindən birinə mahnı bəstələdiyini söylədi və not yazısını ona təqdim etdi.
Tədbirdə universitetin Musiqi və incəsənət departamentinin müdiri, əməkdar müəllim, professor Zülfiyyə Sadıqovanın rəhbərliyi ilə universitetin Kamera orkestri geniş konsert proqramı ilə çıxış etdi. Solistlər Xəzər Universitetinin müəllimi Məhsəti Cabbarova və müğənni Elvin Əliyev idi. Universitetin əməkdaşlardan ibarət xor qrupu, oğlan və qızlardan ibarət rəqs kollektivləri də tədbirdə çıxış etdilər.
Sonda professor Hamlet İsaxanlı tədbirin təşkilatçılarına və iştirakçılara təşəkkürünü bildirdi.