2019-cu il fevralın 24-də Xəzər Universitetinin İqtisadiyyat və menecment departamentinin müəllimləri –Dr. Kamran Behbudov və Dr. Qəhrəman Yusupovun rəhbərliyi ilə turizm və otelçilik ixtisasının 24 tələbəsi, həmçinin, Mevlana mübadilə proqramı ilə ölkəmizdə qısa müddətlik təhsil alan Türkiyə Respublikasındakı universitetlərdən gələn tələbələrin iştirakı ilə Xocalı Soyqırımı memorialına yürüş həyata keçirdilər.
Tədbirdə tələbələrə 1992-ci il fevralın 26-da erməni quldur dəstələrinin və hərbi-cinayətkar qruplaşmanın Azərbaycan xalqına qarşı törətdiyi Xocalı Soyqırımı, bu soyqırımda dünyasını dəyişən, itkin düşən şəxslər haqqında məlumat verildi və Xocalı Soyqırımının ölkədaxili və beynəlxalq miqyasda tanınması üçün aparılan və gələcəkdə aparılması vacib olan işlər haqqında müzakirə baş tutdu. Həmçinin, bir qrup tələbə Xocalı ilə bağlı hazırladıqları məlumatlarla tədbir iştirakçıları qarşısında çıxış etdi. Tədbirin sonunda tələbələr hazırladıqları və üzərində “Justice for Khocaly” və “Susma” şüarları yazılan ağzı qapayan nəfəsliklə Xocalı həqiqətlərinin tanınması və beynalxalq ictimaiyyətin diqqətinin bu soyqırıma cəlb edilməsi üçün həm ingilis, həm də Azərbaycan dillərində çağırış etdilər.