2019-cu il fevralın 20-də Xəzər Universitetinin Beynəlxalq əlaqələr şöbəsində “Mevlana Açıq qapı” sessiyası keçirildi. Mevlana proqramı vasitəsilə Türkiyədə mübadilə semestrini yenicə tamamlayıb qayıtmış Xəzər Universitetinin tələbələri, eləcə də, hazırda Xəzər Universitetində Mevlana mübadilə proqramı vasitəsilə təhsil alan tələbələr sessiyada iştirak edərək, öz təcrübələrini digər tələbələrlə bölüşdülər. Onlar, həmçinin, yoldaşlarının Türkiyədə təhsil və Türkiyə Universitetləri haqqında suallarını cavablandırdılar.

Aytac Ağayeva (mühasibat uçotu və audit, bakalavr), Danu Ade Setiavan (bank işi, magistr) və Məryəm Adli (biznesin idarə edilməsi, magistr) Mevlana mübadilə proqramı vasitəsilə Türkiyədə mübadilə təhsili allaraq, yenicə Xəzər Universitetinə qayıdaraq öz təhsillərini davam etdirirlər. Onlar tələbələrə Türkiyədə yaşamaq, eləcə də, orada həyata adaptasiya olmaq barədə faydalı məsləhətlər verdilər, Xəzər Universiteti və Türkiyə universitetləri arasındakı fərqlərdən danışdılar.

İhsaniye Yıldırım (beynəlxalq münasibətlər, bakalavr) və Ayşenur Kurt (biznesin idarə edilməsi, bakalavr) hazırda Xəzər Universitetində mübadilə proqramı vasitəsilə təhsil alırlar və Selçuk Universitetinin tələbələridirlər. Onlar da Mevlana proqramına müraciət etməyə hazırlaşan tələbələrlə öz ölkələri haqqında biliklərini paylaşdılar. Onlar, həmçinin, Azərbaycanda və Xəzər Universitetində təcrübələri haqqında rəylərini bölüşdülər.

Sessiyanın nəticəsi olaraq, tələbələr Mevlana mübadilə proqramı və Türkiyədə təhsil haqqında faydalı və praktiki məlumatlar əldə etmiş oldular.