2019-cu il fevral 4-dən 8-dən Xəzər Universitetinin Siyasi elmlər və fəlsəfə departamentinin müdiri Elmar Mustafayev, Psixologiya departamentinin koordinatoru və Xəzər Psixologiya Mərkəzinin direktoru Mələk Kərimova, Beynəlxalq əlaqələr şöbəsinin koordinatoru Lamiyə Pənahova və Psixologiya departamentinin müəllimi Nilufər Əlizadə Niderland Biznes Akademiyasında görüş və təlimlərdə oldular.

6 ölkədən olan 10 partnyor universitetdən 35 nümayəndənin iştirak etdiyi görüşlər Erasmus+ KA2 layihəsi “Mediasiya: Təlim və ictimai transformasiya (MEDIATS) çərçivəsində aparılırdı. Layihə tərəfindən hədəflənən bir sıra məsələlər, habelə mediasiya federasiyasının yaradılması, mediasiya üzrə təhsil kurrikulumunun hazırlanması məsələləri görüşlər zamanı müzakirə olundu. İştirakçılar, həmçinin, mediasiyanın vacibliyi və onun cəmiyyətdə rolu haqqında geniş informasiya verən təlimlərdə iştirak etdilər.

Məhsuldar həftənin sonunda hər bir ölkənin nümayəndələri növbəti 3 il ərzində layihə çərçivəsində görüləcək işlər və atılacaq addımları özündə əks etdirən tədbirlər planını təqdim etdilər.