2018-ci il mayın 21-24-də Xəzər Universitetində keçirilmiş, universitetin təsisçisi, Direktorlar və Qəyyumlar Şurasının sədri professor Hamlet İsaxanlının 70 illik yubileyinə həsr olunmuş “Riyazi fizikanın operatorları, funksiyaları və sistemləri” adlı beynəlxalq konfransın materiallarından ibarət irihəcmli toplu – “Operators, Functions, and Systems of Mathematical Physics Conference” Xəzər Universitetinin Nəşriyyatında çapdan çıxmışdır.

Topluda Azərbaycan, Türkiyə, İran, Rusiya Federasiyası, Gürcüstan, Ukrayna, Qazaxıstan, Almaniya, Fransa, İspaniya, Səudiyyə Ərəbistanı Krallığı, Avstriya, Finlandiya, ABŞ, İtaliya, İngiltərə, Birləşmiş Ərəb Əmirlikləri və İsveçdən olan 80-ə yaxın görkəmli alim, aparıcı mütəxəssis və tədqiqatçıların məruzələrinin tezisləri yer almışdır.

Topluya konfransın təşkilatçıları – Əli Hüseynli (Xəzər Universiteti), İlmar Qəhrəmanov (Memar Sinan Təsviri Sənət Universiteti, Türkiyə) və Mansur İsmayılov (Qəbzə Texniki Universiteti, Türkiyə) ingilis və rus dillərində ön söz yazmışlar.

Topluda professor Boris Mityaqin, AMEA-nın müxbir üzvü Misir Mərdanov və Xəzər Universitetinin prorektoru İsaxan İsaxanlının yazdıqları “Hamlet İsaxanlı (İsayev): həyat və yaradıcılığı haqqında oçerk” adlı geniş məqalə ingilis və rus dillərində verilmiş, oçerkə professor Hamlet İsaxanlının əsas elmi və bədii əsərlərinin biblioqrafiyası əlavə edilmişdir.

Topluda professor Hamlet İsaxanlının həyatına və konfransa aid çoxlu fotoşəkil də oxuculara təqdim olunur.

Toplu nəfis şəkildə çap edilmişdir.