2019-cu il yanvarın 29-da AMEA Milli Azərbaycan Tarixi Muzeyində Muzeyin Xarici əlaqələr və elmi-kütləvi iş şöbəsi və Gənc Alim və Mütəxəssislər Şurasının birgə təşkilatçılığı ilə “Şəhər incəsənəti. Azərbaycan” (City Art Azerbaijan)” layihəsinin geniş təqdimat tədbiri keçirildi.

Tədbirdə layihənin ideya müəllifi, tərəfdaşları –Xəzər Universiteti, AMEA Gənc Alim və Mütəxəssislər Şurası, Azərbaycan Memarlıq və İncəsənət İnstitutu, Milli Azərbaycan Tarixi Muzeyi, Qobustan Milli Tarixi-Bədii Qoruğu, Mirzə Ələkbər Sabir Fondu və Azərbaycan Arxeoloqlar Cəmiyyəti İB-nin təmsilçiləri, gənc rəssam, heykəltəraş, fotoqraf və KİV nümayəndələri iştirak edirdilər.

Tədbiri giriş sözü ilə açan muzeyin direktoru, akademik Nailə Vəlixanlı qonaqları salamladı. Qeyd etdi ki, gənclər arasında Bakının şəhər incəsənətinin və xalqımızın tarixini və istedadını təbliğ, incəsənətin inkişafının dəstəklənməsi önəmlidir. Gənclərin yaşadıqları şəhərləri gözəlləşdirmək və bu məqsədli, mütərəqqi ideyalarını təşviq və gələcəkdə tətbiq etmək, “Şəhər incəsənəti” ideyasının və anlayışının gənclər arasında yayılması və genişləndirilməsini vacibdir. Akademik N.Vəlixanlı bu istiqamətdə həyata keçiriləcək layihənin uğurlu olmasını təmənni edib və iştirakçılara uğurlar arzuladılar.

Daha sonra Milli Azərbaycan Tarixi Muzeyi Gənc Alim və Mütəxəssislər Şurasının sədri Sevinc Nəsirova, AMEA Arxeologiya və Etnoqrafiya İnstitutunun elmi işçisi və Xəzər Universitetinin Tarix və Arxeologiya departamentinin əməkdaşı, layihənin ideya müəllifi Orxan Zamanov, Xəzər Universitetinin İctimai əlaqələr və media üzrə direktoru Əlövsət Əmirbəyli, Xəzər Universitetinin Rəssamlıq və Təsviri Sənət Muzeyinin direktoru Afaq Kərimova, Xəzər Universitetinin Tarix və Arxeologiya departamentinin müdiri, trasoloq-arxeoloq Roza Arazova, Qobustan Milli Bədii-Tarixi Qoruğunun əməkdaşı, rəssam Səidə Musayeva, Mirzə Ələkbər Sabir Fondunun prezidenti Sevda Tahirli, AMEA Gənc Alim və Mütəxəssislər Şurasının sədri Famin Salmanov, AR Prezidenti yanında QHT-lərə Dəstək Şurasının katibi və üzvü Nərgiz Xələf, AMEA Arxeologiya və Etnoqrafiya İnstitutunun Elmi-Ekspozisiya şöbəsinin müdiri və AAC sədri Fərhad Quliyev çıxış etdilər.