2019-cu il yanvarın 16-da dünyanın aparıcı neft-qaz şirkətlərindən hesab olunan Malayziyanın Petronas şirkətinin Azərbaycan nümayəndəliyinin əməkdaşları Xəzər Universitetində rektor Dr. Hassan Niknafsla universitetin “Neftçilər” kampusunda görüşdülər. Görüşdə, həmçinin, Beynəlxalq əlaqələr şobəsinin əməkdaşları Turan Cəfərova və Lamiyə Pənahova iştirak edirdilər.
Şirkətin Azərbaycan nümayəndəliyindən görüşdə İnsan Resursları və Korporativ xidmətlər şöbəsinin rəhbəri Şeyda Mehdiyeva və şirkətin əməkdaşları Aysel Allahverdiyeva və Əli Hüseynov iştirak edirdilər. Görüşdə qonaqlar Xəzər Universiteti ilə əməkdaşlığa və Xəzər Universitetinin tələbələrinin Petronas Təhsil Sponsorluq Proqramına cəlbinə maraqlı olduqlarını bildirdilər. Adı çəkilən proqram çərçivəsində universitetin bir neçə tələbəsi Malayziyanın Petronas Texnologiya Universitetində kimya mühəndisliyi, neft-qaz mühəndisliyi və neft-qaz geologiyası ixtisasları üzrə bakalavr təhsili almaq şansı əldə edəcəklər. Tələbələrin seçim prosesi Petronas şirkətinin Azərbaycan nümayəndəliyi tərəfindən aparılacaq.
Petronasın Azərbaycan nümayəndəliyinin əməkdaşlarının cari ilin fevralında yenidən Xəzər Universitetinə səfəri və tələbələrlə görüşü planlaşdırılır.