Xəzər Universitetinin İqtisadiyyat və menecment departamentinin koordinatorları Dr. Bahadır Baysal və Dr. Elsevər İbadovun rəhbərliyi və Beynəlxalq Əlaqələr şöbəsinin koordinasiyası ilə 2018-ci ilin payızında P2P Facebook Qlobal Rəqəmsal (Peer to Peer: Facebook Global Digital Challenge) müsabiqəsində iştirak etmiş FIST (Females Inside Society Taboos) komandası “Honorable Mentions (şərəfli adçəkmə)” mükafatına layiq görülüb. Mükafat olaraq komandalara öz faydalı işlərini davam etdirmələri üçün 500 ABŞ dolları məbləğində Facebook reklam krediti təqdim olunacaq. Bu kateqoriyada nailiyyət əldə edən ikinci universitet Livanın Haigazian Universitetinin tələbələrindən ibarət olan Hope for Helpers komandasıdır.

FIST komandası İqtisadiyyat və menecment fakültəsinin 3-cü kurs tələbələrindən ibarət idi: İlahə Qasımova (Maliyyə), Səadət Sövzəliyeva (Maliyyə), Anar Qasımov (Maliyyə), Məhəmməd Bağırov (Mühasibat uçotu və audit) və Rasim İslamlı (Menecment).

Qeyd etmək lazımdır ki, Xəzər Universiteti Azərbaycandan son iki ildə Peer to Peer Facebook Qlobal Rəqəmsal Müsabiqəsində iştirak edən yeganə universitetdir. Xəzər Universitetinin müsabiqədə iştirakı kifayət qədər uğurlu olmuşdur. Müsabiqəyə ilk qatıldığımız zaman komandamız “Imagine” böyük bir coğrafiyanı təmsil edən çoxsaylı komandalar arasında 3-cü yeri tutmuşdu. Universitet olaraq bu qlobal müsabiqədə iştirakımız Beynəlxalq Əlaqələr şöbəsi və İqtisadiyyat və menecment fakültəsi tərəfindən birgə koordinasiya olunur.

Peer to Peer Facebook Qlobal Rəqəmsal Müsabiqəsi sənaye ilə təhsilin əməkdaşlığının gözəl bir nümunəsidir: müsabiqədə iştirak edən tələbələr real problemləri həll edərək praktiki biliklər əldə edirlər. Hər bir universitet tərəfindən təşkil olunmuş tələbələrdən ibarət komandalar ekstremizmin müxtəlif növləri ilə mübarizə aparmaq məqsədi ilə onlayn marketinq kampaniyası yaradırlar. Ölçülə bilən və real nəticələr əldə edilməsi üçün uğurlu kampaniya həyata keçirilməsi məqsədilə hər bir komandaya müəyyən büdcə ayrılır.

Xəzər Universitetinin FIST komandasının həyata keçirdiyi kampaniya haqqında ətraflı məlumat aşağıdakı linkdədir:

https://www.facebook.com/FistP2P/