2018-ci il dekabrın 27-də Xəzər Universiteti Tarix və arxeologiya departamentinin 25 illik yubileyi ilə əlaqədar tədbir keçirildi. Tədbirdə universitetin rəhbərliyi və əməkdaşları, məzunlar və tələbələr, Milli Azərbaycan Tarix Muzeyinin əməkdaşları, Azərbaycan Milli Elmlər Akademiyasının müxtəlif institutlarının əməkdaşları, Bakı Dövlət Universiteti, Azərbaycan Dövlət Pedaqoji Universiteti, Azərbaycan Respubikası Mədəniyyət Nazirliyi və Sabir fondunun nümayəndələri iştirak edirdilər.

Tədbirin açılışından və Milli Azərbaycan Tarix Muzeyinin direktoru akademik Nailə Vəlixanlının  təbrik məktubu oxunduqdan sonra Xəzər Universitetinin Təhsil fakültəsinin tarix müəllimliyi ixtisasının ikinci kurs tələbələrinin iştirakı ilə Tarix və arxeologiya departamentinin hazırladığı “Fənlərin mübahisəsi” adlı satirik səhnəcik iştirakçıların marağına səbəb oldu.

Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı və departamentin müdiri Roza Arazova departament haqqında öz xatirə və fikirlərini bölüşdülər.

Yubiley üçün hazırlanmış tort kəsildikdən sonra söz universitetin məzunlarına və universitetin İctimai əlaqələr və media üzrə direktoru Əlövsət Əmirbəyliyə verildi.

Xəzər Universitetinin tərəfdaşı olduğu “Şəhər incəsənəti” layihəsinin Tarix və Arxeologiya departamentinə məxsusi hazırladığı ilkin loqo versiyası göstərildi.

Sonda qonaqlar və tələbələrlə xatirə fotoları çəkildi və çay süfrəsi arxasında tədrisə aid müzakirələr aparıldı.