2018-ci il dekabrın 27-də Xəzər Universiteti Təhsil fakültəsi filologiya ixtisasının I və IV kurs tələbələri Azərbaycan dilinin dialektologiyası və Müasir Azərbaycan fənlərinin tədrisi çərçivəsində Azərbaycan Milli Elmlər Akademiyası (AMEA) Nəsimi adına Dilçilik İnstitutunda oldular. İnstitutun direktoru akademik Möhsün Nağısoylu institutun tarixindən, alimlərin gərgin əməyindən bəhs edərək, zəhmətin, əməyin nəticəsinin həmişə uğurlu və sevindirici olduğunu vurğuladı, vətənin gələcəyinin indiki gənclərin əlində olduğunu qeyd etdi, tələbələri bunun məsuliyyətini və şərəfini hiss etməyə, təhsil aldıqları, dünya təhsil sistemi sahəsində böyük etibara malik Xəzər Universitetinin adına layiq ixtisaslı kadr kimi yetişmələrini arzu etdi. Sonra o, tələbələri maraqlandıran suallara cavab verdi, Azərbaycan dilçilik elminin nailiyyətlərindən danışdı.

Xəzər Universiteti Təhsil departamentinin müəllimi, Dilçilik İnstitutunun Təhsil şöbəsinin müdiri, filologiya üzrə fəlsəfə doktoru Qətibə Vaqifqızı institutun iş fəaliyyətindən bəhs etdi.

Tələbələr daha sonra institutun şöbələri ilə tanış oldular. Tətbiqi dilçilik şöbəsinin müdiri professor İsmayıl Məmmədli, şöbənin əməkdaşları filologiya elmləri doktoru Nəriman Seyidəliyev, institutun qocaman əməkdaşı, məşhur leksikoqraf Əliheydər Orucovla çiyin-çiyinə işləmiş Nigar Ağayeva, filologiya üzrə fəlsəfə doktoru Xədicə Heydərova, filologiya üzrə fəlsəfə doktoru Fidan Salayeva lüğətlərin hazırlanması, tərtibi, yeni sözlərin lüğətlərə hansı prinsiplər əsasında daxil edilməsi, Azərbaycanda lüğətçiliyin müasir durumu haqqında məlumat verdilər. Sonra tələbələr Türk dilləri şöbəsi ilə də tanış oldular, şöbənin aparıcı elmi işçisi filologiya üzrə fəlsəfə doktoru Elnarə Əliyevanın şöbənin tarixindən bəhs edən söhbətini dinlədilər. Terminologiya şöbəsinin müdiri, Terminologiya Komissiyasının sədr müavini professor Sayalı Sadıqova tələbələrlə qısa söhbətində Azərbaycan dilinin terminoloji bazasının inkişaf istiqamətlərinə toxundu. Monitorinq şöbəsinin müdiri filologiya üzrə elmlər doktoru Sevinc Əliyeva Azərbaycan dilinin dövlət dili kimi inkişafı və dilin təmizliyinin qorunması, ədəbi dil normalarının pozulmasının qarşısının alınması, reklamlarda, ictimai obyektlərdə, kütləvi informasiya vasitələrində Azərbaycan dilinin normalarına riayət olunmasının təmin edilməsi məsələlərində şöbənin göstərdiyi fəaliyyət proqramı və əldə etdikləri nəticələr, monitorinqlərin keçirilmə qaydaları, bu zaman hansı prinsiplərin əsas götürüldüyü haqqında məlumat verdi.

Dialektologiya şöbəsinin müdiri filologiya üzrə fəlsəfə doktoru, dosent Kifayət İmanquliyeva tələbələrə şöbə haqqında məlumat verdi, sonra Azərbaycan dilinin dialektologiyasının tarixi, ilk dialektoloji araşdırmalar, bu sahədə avropalı alimlərin tədqiqləri haqqında mühazirə oxudu. Şöbənin əməkdaşlarından professor Məhərrəm Məmmədli müxtəlif dialekt və şivələri tədqiqata cəlb edən alimlər, Azərbaycan dialektoloqları, Güney Azərbaycan dialektləri, filologiya üzrə fəlsəfə doktoru, dosent Qüdsiyyə Qəmbərova dialektoloji lüğətlərin hazırlanması, tərtibi, dialekt faktlarının toplanması qaydaları barədə tələbələrə bilgilər verdilər. Söhbət zamanı tələbələr yeni nəşr olunan Naxçıvan Dialektoloji Atlasının hazırlanma prosesi, atlasın quruluşu, istifadə qaydaları ilə yaxından tanış oldular.

Görüşün sonunda tələbələrə xoş arzularını bildirən şöbə müdiri Kifayət İmanquliyeva nəfis tərtibatla və xüsusi bir diqqətlə hazırlanan və nəşr olunan Naxşıvan Dialektoloji Atlasını Xəzər Universitetinə hədiyyə etdi.