2018-ci il dekabrın 25-dən 27-dək “Robotiks” komandasının (Məhəmməd Məmmədli, Əli Rüstəmov) dəstəyi ilə Azərbaycanda baş tutmuş 3 fərqli yarışmada Xəzər Universiteti Mühəndislik və Tətbiqi Elmlər fakültəsinin Kompüter mühəndisliyi ixtisasının 3-cü kurs tələbəsi Emin Bayramovun 3 fərqli innovativ kəşfi finallara vəsiqə qazandı:
1. Cleantech Ideation Bootcamp 2018 Social İnnovation Lab tərəfindən həyata keçirilmiş yaşıl biznes ideyaları və sahibkarlıq yolu ilə iqlim dəyişikliyini həll etmək üçün yenilikçi həllərin axtarıldığı Start-Up yarışmasıdır. Xəzər Universitetinin komandası “Drinko” ideyası ilə yarışa qatıldı və 4-cü yerə layiq görüldü. “Drinko” dünyada hazırda üzləşilən 2 ən böyük qlobal problemin həllinə irihəcmli dəstək vermək məqsədilə ərsəyə gətirilmiş ideyadır. Bunlar təmiz suya olan tələbin qarşılanması və atmosferdəki CO2 emissiyasının azaldılmasıdır.
2. Azərbaycan Respublikasının Gənclər və İdman Nazirliyi tərəfindən təşkil olunmuş “İdeya var!” gənclərin II Ümumrespublika elmi-yaradıcılıq müsabiqəsinin keçirilməsinin əsas məqsədi gənclərin elmi və yaradıcılıq fəaliyyətini, sosial təşəbbüskarlığını stimullaşdırmaq, innovativ potensialının nümayiş etidirilməsi üçün əlverişli şərait yaratmaq, onları tədqiqat və elmi araşdırma fəaliyyətinə həvəsləndirməkdır. Xəzər Universitetini burada təmsil edən robotçular “Robin Food” ideyası ilə finallarda uğurla iştirak etdilər və sertifikatla qiymətləndirildilər. “Robin Food” ərzaq yardımına ehtiyac duyan şəxslərin ərzaqla təminatını həyata keçirən platformadır. Bunun üçün proqram sistemini də quran tələbələri ərzağını paylaşmaq istəyən şəxslərin yerlərini GPS sistemi ilə izləyib ağıllı maşınları həmin əraziyə yollayır və əldə olunan ərzaqlar testlərdən keçdikdən sonra paketlənib əvvəlcədən təyin olunmuş ərazilərə aparılaraq, burada ərzaq yardımına ehtiyacı olan şəxslərə verilir.
3. Universitetin Bakı Mühəndislik Universitetində baş tutmuş IV Qış Elm Festivalında da iştirak etmiş komandası “SDS” texniki innovativ ideyaları ilə final mərhələsində çıxış etdilər. SDS – qapı və kassaların açılması və bağlanması üçün təhlükəsizlik kodu kimi qapını döymə mexanizmini istifadə edən təhlükəsizlik sistemidir. Qırılma, itmə və oğurlanma kimi çox rastlanan problemləri olan açar sistemini aradan qaldırmağı hədəfləyən ideya təhlükəsizliyi artırmaq məqsədilə proqram sisteminə də bağlıdır.