2018-ci il dekabrın 26-da Xəzər Universitetində Azərbaycan Respublikasının qabaqcıl təhsil işçisi, dosent Rafiq Əhmədovun təqaüdə çıxması münasibətilə tədbir keçirildi.

Tədbirdə universitetin təsisçisi, Direktorlar və Qəyyumlar Şurasının sədri professor Hamlet İsaxanlı geniş çıxış edərək, Rafiq Əhmədovun Xəzər Universitetində çalışdığı 22 illik fəaliyyət yoluna nəzər saldı. Qeyd etdi ki, Rafiq Əhmədov bu illər ərzində tədris prosesinin bütün pillələri üzrə - Kompüter elmləri departamentinin müdiri, Mühəndislik və Tətbiqi Elmlər fakültəsinin dekanı, Tədris işləri üzrə prorektor, İdarəetmə və tələbə işləri üzrə prorektor, İnstitusional Araşdırmalar Mərkəzinin direktoru və universitetin Mərkəz kampusu üzrə rektorluğun nümayəndəsi kimi məsul vəzifələrdə çalışmış, bütün mərhələlərdə ona göstərilən etimadı doğruldaraq, yüksək peşəkarlıq nümayiş etdirmişdir. Beləliklə də, Xəzər Universitetinin bu gün Azərbaycan təhsil sistemində və ölkənin hüdudlarından kənarda malik olduğu nüfuzu qazanmasında, beynəlxalq reytinqlərdə mütəmadi olaraq layiqli yerlər tutmasında Rafiq Əhmədovun xidmətləri böyükdür. Rafiq Əhmədovun şəxsi keyfiyyətlərindən danışan natiq onun öz səmimi, qayğıkeş və təmkinli davranışı ilə kollektivdə böyük hörmət azandığını bildirdi. Professor Hamlet İsaxanlı çıxışının sonunda Rafiq Əhmədova səmərəli əməyinə görə kollektiv adından təşəkkürünü bildirdi və ona yaxşı istirahət, cansağlığı, uzun ömür arzuladı.

Tədbirdə Xəzər Universitetinin rektoru Dr. Hassan Niknafs, Tədris işləri üzrə prorektor Məhəmməd Nuriyev, İdarəetmə və tələbə işləri üzrə prorektor İsaxan İsaxanlı, İctimai əlaqələr və media üzrə direktor Əlövsət Əmirbəyli, Humanitar və Sosial Elmlər fakültəsinin dekanı Cabir Xəlilov, Təhsil fakültəsinin dekanı Elza Səmədova və “Xəzər Xəbər” jurnalının baş redaktor müavini Əlirza Balayev çıxış edərək, Rafiq Əhmədovun universitetdəki çoxşaxəli fəaliyyətinin müxtəlif cəhətlərindən, həmçinin şəxsi keyfiyyətlərindən danışdılar, ünvanına xoş sözlər söylədilər.

Professor Hamlet İsaxanlı və Dr. Hassan Niknafs Rafiq Əhmədova təşəkkürnamə, hədiyyə və gül dəstəsi təqdim etdilər.

Sonda Rafiq Əhmədov tədbirin təşkilinə görə universitet rəhbərliyinə və iştirakçılara təşəkkürünü bildirdi.