2018-ci il dekabrın 27-də Xəzər Universitetinin Mərmər salonunda Dünya azərbaycanlılarının həmrəyliyi günü və yeni ilə həsr olunmuş tədbir keçirildi. Tədbirdə universitetin rəhbərliyi və əməkdaşları, əcnəbi müəllimlər və qonaqlar iştirak edirdilər.

Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı, universitetin rektoru Hassan Niknafs, Elmi işlər üzrə prorektor İradə Xəlilova, İdarəetmə və tələbə işləri üzrə prorektor İsaxan İsaxanlı və digərləri çıxış edərək, yola salınan ildə qazanılmış nailiyyətlərdən danışdılar, kollektivi təbrik edib, ona uğurlar arzuladılar.

Tədbirdə Azərbaycanda 2017-2018 akademik ilin Fulbright tədqiqatçısı, Çikaqo Dövlət Universitetinin professoru Nadeem Fazal Xəzər Universitetində magisrt və PhD tələbələrə akademik məqalənin yazılması, tədqiqat metodları üzrə seminarlar və təlimlər təşkil etdiyinə görə təşəkkürnamə ilə təltif olundu.

Çay süfrəsi ətrafında keçən şənlikdə universitetin qurumları arasında mahnı və şeir müsabiqəsi keçirildi, qaliblər mükafatlandırıldılar. İştirakçılara universitetin Kamera orkestinin (bədii rəhbər Musiqi və incəsənət departamentinin müdiri, əməkdar müəllim, pianoçu Zülfiyyə Sadıqova) konserti və universitet əməkdaşlarından ibarət xor kollektivinin ifasında mahnılar təqdim olundu. Əməkdaşlar rəqs edib əyləndilər. Şənlik məclisi xoş əhval-ruhiyyə ilə başa çatdı.