2018-ci il dekabrın 23-də Xəzər Universitetinin İqtisadiyyat və menecment fakültəsi və Milli Mühasiblər Forumunun növbəti seminarı keçirildi. Budəfəki seminarda da mühasibat uçotu sahəsinin tanınmış mütəxəsissləri çıxış edirdilər.

Seminarı giriş sözü ilə açan Milli Mühasiblər Forumunun Təşkilat Komitəsinin sədri Ruslan Atakişiyev forumun fəaliyyət prinsipləri və tədbirin keçirilməsi məqsədi barəsində iştirakçıları məlumatlandırdı. Daha sonra Xəzər Universitetinin İqtisadiyyat və Menecment fakültəsinin müəllimi Dr. Elsevər İbadov seminar iştirakçılarını salamladı. Xəzər Universitetinin elm və təhsil sahələrindəki fəaliyyətləri və yeni MBA proqramları haqqında iştirakçılara məlumat verdi.

Sonra Azərbaycan Respublikası Vergilər Nazirliyinin Vergi siyasəti departamentinin baş direktorunun müavini Şamil Ərəbov və Azərbaycan Respublikası Vergilər Nazirliyinin Vergi siyasəti departamentinin şöbə müdiri Gülnar İsayeva “Azərbaycan Respublikasının Vergi Məcəlləsinə edilmiş əlavə və dəyişikliklərin izahı”, İqtisadi Araşdırmalar və Tədris Mərkəzinin vitse-prezidenti Radil Fətullayev “Azərbaycan Respublikasının Vergi Məcəlləsinə edilmiş əlavə və dəyişikliklərin sahələr üzrə müəssisələrə təsiri”, Bakı Hesabat Mərkəzinin direktoru Mehdi Babayev “Azərbaycan Respublikasının Vergi Məcəlləsinə edilmiş əlavə və dəyişikliklərin Mühasibat (maliyyə) uçotuna təsiri, bu dəyişikliklərin problem və anlaşılmazlıq yarada biləcək məqamlarının izahı”, Audit üzrə mütəxəssis Altay Cəfərov isə “Sosial Sığorta Haqqında Qanuna edilmiş dəyişikliklərin izahı və tətbiqi qaydaları” mövzusunda çıxış etdilər.

Daha sonra iştirakçıları maraqlandıran suallar cavablandırıldı, mövzular ətrafında müzakirələr aparıldı və sonda iştirakçılara Milli Mühasiblər Forumunun sertifikatları təqdim edildi. Seminarda bir sıra tanınmış müəssisələrin baş mühasibləri, mühasibləri, maliyyə menecerləri, universitet müəllimləri və tələbələri iştirak edirdilər.

Qeyd edək ki, Xəzər Universitetinin İqtisadiyyat və Menecment fakültəsinin və Milli Mühasiblər Forumunun əməkdaşlığı çərçivəsində təşkil edilən silsilə seminarların hər ay keçirilməsi planlaşdırılır.