2018-ci il dekabrın 17-də Lənkəran şəhər Heydər Əliyev Mərkəzində Xəzər Universitetinin müəllimi tanınmış şair Qardaşxan Əzizxanlının 60 illik yubileyi münasibətilə yaradıcılıq gecəsi keçirildi. Şairin “İlkim də sən, indim də sən, sonum sən” adlı son şeirlər kitabının təqdim edildiyi tədbirdə icra hakimiyyəti aparatının əməkdaşları, Azərbaycan Yazıçılar Birliyi (AYB) Lənkəran zona filialının üzvləri, müxtəlif təbəqədən olan poeziya həvəskarları, mədəniyyət, təhsil, səhiyyə işçiləri, Lənkəran Dövlət Universitetinin, Lənkəran Peşə Liseyinin, həmçinin, rayonda fəaliyyət göstərən digər təhsil müəssisələrinin müəllim, tələbə kollektivi və məktəblilər iştirak edirdilər.
Tədbir iştirakçıları əvvəlcə yubilyarın yaradıcılığına dair “Qardaşxan Əzizxanlı-60” adlı sərgi ilə tanış oldular. Sərgidə şairin müəllifli, layihə rəhbəri olduğu kitablar və mətbuat materialları sərgilənirdi.
Tədbir AzTV-nin Qardaşxan Əzizxanlıya həsr etdiyi “Qaşla göz arasında” adlı qısametrajlı filmdən fraqmentlə başladı və xalq şairi Məmməd Arazın Q.Əzizxanlı haqqında dediyi sözlər səsləndirildi: “O, görüm, duyum şairidir... Sözünü öz ürəyindən alan şairdir...”
Şair, yazıçı, kinodramaturq, Azərbaycan Yazıçılar Birliyinin Yaradıcılıq məsələləri üzrə katibi İ.Fəhmi 100 cildlik “Fikir antologiyası”nın baş redaktoru, “Məmməd Araz Poeziya günü” layihəsinin rəhbəri kimi də Qardaşxanın xidmətlərini qeyd edib. O, əlavə edib ki, mən hələ Qardaşxandan başqa kunq-fu üzrə “qara kəmər” sahibi olan ikinci şair tanımıram.
Tədbirdə “Ədalət” qəzetinin baş redaktoru əməkdar jurnalist İradə Tuncay, millət vəkili Aqil Abbas və başqaları çıxış etdilər.
Tədbirdə şəhər və kənd orta məktəbinin şagirdləri şairin şeirlərindən ibarət ədəbi kompozisiya ilə çıxış etdilər. Lənkəran şəhər C.Cabbarlı adına 1 saylı Uşaq musiqi məktəbinin müəllimləri Əlirza Yuniszadə (tar), Təranə Şərifovanın (kamança) müşayiətilə İmanverdi Ağayev Qardaşxan Əzizxanlının şeirlərini muğam üzərində ifa etdi.
Tədbirin sonunda Qardaşxan Əzizxanlı təşkilatçılara və iştirakçılara təşəkkürünü bildirdi.
Tədbir barədə bu linklər vasitəsilə daha ətraflı tanış olmaq olar:
http://artkaspi.az/az/qardasxan-ezizxanlinin-yaradiciliq-gecesi-kecirilib/#.XBoZ51UzbIU;
http://www.enter.news/az/news/society/166249/qardashxan-ezizxanlinin-yaradiciliq-gecesi-lenkeranda-kechirildi-fotolar?fbclid=IwAR3dDH0j550vxiP7UCcXd_JCkUFENULjsFDFLeIx5WzWXnYjaAqcEonNlKU#.XBlVv1UzbIV.