2018-ci il dekabrın 14-də Xəzər Universitetinin “Mərmər” zalında Üzeyir Hacıbəyli adına Bakı Musiqi Akademiyasının doktorantı Rüfət Piriyevin “Gözəl yurdum Azərbaycan” adlı solo konserti oldu.

Azərbaycan Xalq Cümhuriyyətinin 100, Ümumilli lider Heydər Əliyevin 95 illiyinə həsr olunmuş bu konsertdə vətənpərvərlik mövzusu ön planda tutulmuşdu. Konsertin keçirildiyi gün həm də görkəmli sənətkar Rəşid Behbudovun da doğum günü idi.

Universitetin müəllim və tələbə heyətinin böyük anşlaqla qarşıladığı konsert proqramını giriş sözü ilə Bakı Musiqi Akademiyasının dosenti, sənətşünaslıq üzrə fəlsəfə doktoru Nərgiz Hüseynova açdı. O, iştirakçılara Azərbaycan musiqi dünyasının zənginliklərindən, xalq və bəstəkar mahnılarının istər ölkə səviyyəsində, istərsə də xaricdə sevilə-sevilə dinlənildiyindən danişdı. Gənc musiqiçilərlə tamaşaçıları tanış etmişdir.

Konserti aparmaq üçün söz Bakı Musiqi Akademiyasının Orta ixtisas musiqi məktəb-studiyasının aparıcı elmi işçisi və müəllimi, sənətşünaslıq üzrə fəlsəfə doktoru, gənc musiqişünas-alim Aytən İbrahimovaya verildi. O, çıxış sözündə Azərbaycan musiqisi, bəstəkar əsərləri haqqında məlumat verdi və Xəzər Universitetinin rəhbərliyinə təşəkkürünü bildirdi.

Konsertin solisti Rüfət Piriyevi gözəl pedaqoq və pianoçu-konsertmeyster Qənirə Həsənova müşayiət edirdi.

“İlahə” xalq çalğı alətləri ansamblının bədii rəhbəri, pedaqoq, tarzən Elməddin Rəsulov da konsert proqramında çıxış etdi. Konsertin maraqlı məqamlarından biri də royalda Aytən İbrahimova, tarzən Elməddin Rəsulov və nağarada Hüseyn Məlikovun müşayiəti ilə trio şəklində səsləndirilən “Azərbaycan” xalq rəqsi oldu.

Sonda Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı təbdirin iştirakçılarına öz təşəkkürünü bildirdi. Tədbir Universitetin nümayəndəsi, gözəl səsə malik olan Məhsəti xanımın və Rüfət Piriyevin maraqlı dueti də dinləyicilərə bir töhfə oldu.

Ümidvarıq ki, bu konsert Xəzər Uniersitetinin müəllim və tələbələrinin yadda qalan xatirələrinə çevriləcək!